Монгол Улсын нийгэм, эдийн засагт сүүлийн таван жил өнгө будаг нялсан Л.Оюун-Эрдэнэ таван жил засаглахдаа чухам юу үлдээв. Тэрэг тэрэг эрээн цаас л үлдэж. Тэнгэр тулсан их төсөл хөтөлбөр, тэртээх өдрүүдийн хоосон мөрөөдлийг шатаахаас өөр зүйлгүй. Өнөөгийн нөхцөл байдалд цааш нь хэрэгжүүлээд явах бараг боломжгүй баримт бичиг л тэнд үлдсэн. Г.Занданшатарын хувьд энэ цаасан дээр нэмж төсөөлөөд явах уу, эсвэл шатаагаад шинээр эхлэх үү гэдэг хоёр замын уулзвар дээр зогсоно. Уг нь түүнийг ард түмэн шинэ залуу Ерөнхий сайд хэмээн чамгүй л дэмжсэн. Ард түмэн ч өнгө будаг нялсан зүйлд илүү их татагдах болсон цаг хойно доо. Эцэст нь хайран таван жилийнхээ амьдралыг алдаж үлдсэн ч ойлгоогүй хэсэг байгаа бололтой. Тэгвэл Л.Оюун-Эрдэнээс ард түмэнд өр үлдсэн, Л.Оюун-Эрдэнээс ард түмэнд ажилгүйдэл, ядуурал үлдсэн. Л.Оюун-Эрдэнээс ард түмэнд татварын дарамт үлдсэн. Л.Оюун-Эрдэнээс ард түмэнд тууз хайчилсан шав харлаж үлдсэн. Одоо ч энэ сүлжээг ажиллуулж байгаа баг хамт олон нь төрд байсаар байна. Тухайлбал, Л.Оюун-Эрдэнээс ТҮЦ-ээс эхлээд цэгцэлж байгаа Х.Нямбаатар үлдэж. Нүүрсний уртын замын тээврийг хэдэн сараар хааж олон арван мянган хүний амьдралаар наадаж байгаа Б.Дэлгэрсайхан үлдэж.

Л.Оюун-Эрдэнийн хувьд хэвлэл мэдээлэл, пиар технологийг тултал ашиглаж чаддагаараа энэ суудалд маш удсан. Тэрбээр таван жилийн өмнө Ерөнхий сайд болсон даруйд МАН-ын XXX Их хурлыг зарлан хуралдуулж, “Шинэ сэргэлтийн бодлого” хэмээх сүрхий баримт бичиг танилцуулсан.

Үүнийгээ ярьсаар, бас шав тавьсаар 2024 оны сонгуульд өнгөтэй орсон. Үнэн хэрэгтээ “Шинэ сэргэлтийн бодлого”-оос нэг ч хэрэгжилт байхгүй. Бүтээн байгуулалт хийчихсэн, хүмүүс тэнд амьдарч, ашиг тус хүртэж байгаа мэт сэтгэгдэл төрүүлж чадсан. Үүний зэрэгцээ авлига, албан тушаалын хэрэгтэй тэмцэнэ хэмээн “Нүүрсний”, “Хөгжлийн банк”-ы гэх мэт сонсгол нэртэй шоу зохион байгуулсан. Үүний үр дүнд Л.Оюун-Эрдэнийн нэр хүнд өссөнөөс бодит үр дүн гараагүй. Т.Аюурсайхан тэргүүтэй цөөн нөхдийг яллаад жинхэнэ эзэд нь өнөөдөр гэм зэмгүй явна. Зарим нь хилийн чанад зугаалж явна. Тэгэхээр баримт бичгээс гадна чамгүй хэдэн шав харлаж үлдсэн.

Мөн “Таван Ш” ажиллагаа гээд нийгмийг шуугиулсан. Энэ ажиллагааны хүрээнд ганцхан муу өвгөнийг сүр дуулиантай барьж ирснээр сураг тасарсан. Жинхэнэ хэргийн эзэд нь хилийн чанад тансаг амьдарч байна. Ганц муу өвгөнийг авчрахдаа Монгол Улсын бараг л бүхий л хэвлэл мэдээллийг “Чингис хаан” зочид буудалд аваачсан байх. Үүний дараа “Залуу Ерөнхий сайд алж байна, дэмжээрэй” хэмээн шуугина биз дээ. Энэ мэтээр тэр хийгээгүй зүйлийг хийсэн мэт харагдуулж чаддагаараа гайхамшигтай. Үүнийхээ хүчинд ч өнгөрөгч 2024 онд үнэмлэхүй ялалт байгуулсан. Гагцхүү 2024 онд дахин Ерөнхий сайдаар тодорсон нөхөр “Шинэ сэргэлтийн бодлого” гээд ярихаар хэт их хуучирсан байж таарна. Тэгэхээр “Арван дөрвөн мега төсөл” гээд хэрэгжих боломжгүй зүйл гаргаж ирээд шоудсан. Үнэн хэрэгтээ “Шинэ сэргэлтийн бодлого”-оосоо 14 зүйл сугалж гаргаж тавиад ярьчихсан. Бас болоогүй, хийх цагтаа хийж чадаагүй Н.Энхбаяр, М.Энхсайхан, Р.Амаржаргал, С.Баяр, С.Батболд, М.Энхболд, Ж.Эрдэнэбат гэх мэт тэтгэврийн нөхдийг хариуцуулаад ирэхээр ард түмэн хүлээгээд авчихна. Яагаад гэхээр Н.Энхбаяраас бүгдээрээ л өөр өөрийн гэсэн олон дэмжигчидтэй хүмүүс. Хэт санаа нь тэднийг рейтингийг өөртөө нааж ажиллах л гэсэн санаа. Түүнээс бус хийх цагтаа хийж чадаагүй ихэнх нь идэж уусан хэргээр чих дэлдийлгэж явсан хүмүүс гэдгийг та бүхэн мэднэ.

Сая унахдаа ч цаасан дээр байгаа “Шинэ сэргэлтийн бодлого”, “14 мега төсөл”-өөс болоогүй нэг муу цүнхнээс болчихсон гэхээр хэвлэл мэдээлэл, пиар технологийг тултал ашиглаж байгааг харуулсан хэрэг:

С.Ууганбаяр