Монгол Улсын Ерөнхий сайд Г.Занданшатар унаад буй эдийн засгийг босгох, албан тушаалтнуудад хариуцлага тооцох гэх мэт тодорхой үндсэн зүйл дээр тулгуурлан ажиллана гэдгээ мэдэгдэж байв. Гэвч түүний танхимд нэгдмэл бодлого байхгүй, Ерөнхий сайдын бодлогыг сөрж байгаа ганц хоёр хүн байж магадгүй дүр зураг сүүлийн өдрүүдэд тодров. Тухайлбал, уул уурхайн бүтээгдэхүүн, тэр тусмаа нүүрсний экспортоос бид төсвөө голчлон бүрдүүлдэг. Гэтэл Дорноговь аймгийн Засаг дарга О.Батжаргал, Мандах сумын Засаг дарга н.Шижир нар шийдвэр гарган, Замын-Үүд болон Ханги Мандал боомтоор экспорт хийдэг уурхайнуудын шороон замын тээврийг зогсоогоод хоёр сар гаруй хугацаа өнгөрчээ. Өнгөрөгч амралтын өдрүүдээр “Нэгүүн.мн” сайт энэ талаар анх мэдээлэв. Бодит байдлаас харахад уртын тээврийг зогсоож хаасан нь орон нутгийн дарга нарын толгой мэдэн шийдчих ч асуудал биш байх.

Үүний цаана нь томоохон хүчин зүйл байгаа хэрэг. Бүтэн хоёр сарын дотор хамаг орлогоо алдсан уурхайнууд ганц ч үг ганхийхгүй байна гэдэг бол асар их айдастай байна гэсэн үг. Ялангуяа Ханги Мандалын боомтоор нүүрс экспортолдог таван нүүрсний уурхай чив чимээгүй өдийг хүрчээ. Зөвхөн нүүрс ч бус тус боомтоор жонш тэргүүтэн уул уурхайн бүтээгдэхүүний экспортын 90 хувь нь хасагджээ. Зөвхөн Б.Дэлгэрсайхан сайдын компаниас вагон авч чадсан уурхайнууд түүний автортой төмөр зам дээр цөөн тооны чингэлгээр экспорт хийж байгаа аж. Ийнхүү эдийн засгийн асар хүнд үед “Муу дээрээ муухай, муухай дээрээ улцан” гэгчээр зөвхөн Хангийн боомтоор Монгол Улс өдөрт 3-4 сая ам.долларын экспорт алдсаар байгаа тухай эх сурвалж мэдээллээ. Өнгөрсөн хоёр сарын хугацаанд 200 орчим сая долларын экспорт Дорноговь аймгийн дарга нарын шийдвэрээр үгүй болж. Хангийн Төмөр замын эзний захиалгаар энэ ажил хийгдсэн бөгөөд “Зөвхөн төмөр замаар тээврээ хий, үгүй бол тэг зогс” гэсэн хатуу нөхцөл тавьсан сураг чих дэлсэв. Энэхүү шийдвэрийн ард ганц л хүн байх боломжтой гэж учир мэдэх хүмүүс ярьж байна.

Уг нь нүүрсний экспортыг нэмэгдүүлэхэд бүх анхаарлаа чиглүүл гэдэг Засгийн газрын бодлого гарсан. Тэргүүн Шадар сайд Эрдэнэс Тавантолгой дээр очиж хатуухан донгодсон. Ерөөсөө нүүрсний экспортоос төсвийн гол орлогоо бүрдүүлдэг улсын хувьд нүүрсээ автозамаар ч, төмөр замаараа ч тээвэрлэж байж сая боломжийн орлоготой байх учиртай. Ялангуяа энэ цаг үед. Төмөр замын нүүрс тээврийг дэмжих нэрээр ийнхүү олон хүний амьдрал ахуйг унагааж, эдийн засагт чамгүй хохирол учруулж байгаа нь Г.Занданшатарын засагт засаж болохгүй, оноо алдах шалтгаан бүхий ямар нэгэн “том” бодлого Дорнын говьд яваад байгаа юм биш биз.

Хэрвээ энэ байдлыг Зам, тээврийн хөгжлийн сайд Б.Дэлгэрсайхан шууд бусаар дэмжиж, зөвхөн төмөр замаар тээвэр хий хэмээн муйхарлаж байгаа мэдээлэл үнэн бол үүний цаана Засгийн газар, Г.Занданшатарын бодлогыг сөрж байна гэж гарцаагүй дүгнэж болохоор. Тун удахгүй МАН-ын Их хурал болно. Үүгээр намын дотоод бүлэг фракцууд эрх ашгаа уралдуулна. Одоо ч далд тулаан эхэлчихсэн байна. Засгийн толгойд наяад оны төлөөллүүд сууж байсан бол өдгөө далаад оны төлөөлөл гарч ирсэн. Харин айсуй Их хурлаар засгийн бодлого сөрж байгаа Б.Дэлгэрсайхан зэрэг жараад онынхны амбиц Г.Занданшатарын засагт халтай байж болох уу. Ахиулж харвал Г.Занданшатарын танхимд өөрийнх нь бодлогын эсрэг яваад зогсохгүй, улс орныхоо эдийн засгийг улам сөхрүүлэх, иргэдийнхээ амьжиргаанд илтэд заналхийлсан бодлого явуулдаг сайд байвал яах юм бол. Суудал нь чамлагдсан олигархиуд эргэж эзнээ ноцдог нь гэм биш зан.

Ерөнхий сайд хэн нэгний албан тушаалыг багадуулсан юм биш биз. Ингэхэд Аж үйлдвэр, эрдэс баялгийн сайд Г.Дамдинням яагаад таг чимээгүй сууна вэ. Стратегийн гол салбарын сайд байж энэ мэт асуудалд анхаарал хандуулахгүй байгаа нь бас л хардлага төрүүлэм.