Ерөнхий сайд Г.Занданшатарын тэргүүлсэн Засгийн газар орон тооны цомхотгол хийх ажлыг эхлүүлээд байгаа. Засгийн газрын хуралдаанаас Засгийн газрын агентлагийн бүтэц, орон тоог есөн хувиар бууруулахаар тогтсон. Үүний дагуу зарим төрийн байгууллагууд орон тооны цомхотгол хийх ажлаа эхлүүлнэ.

БОЛОВСРОЛЫН УДИРДЛАГЫН БАГТ БАЙГАА 4000 АЖИЛТНАА ЦОМХОТГОНО

Боловсролын салбарт нийтдээ 94 мянга орчим багш, ажилчин бий. Үүнээс 48 мянга орчим нь багш. Тиймээс тус салбарт цомхотгол хийхдээ багш нарыг цомхотгоно, хална гэсэн ойлголт байхгүй гэдгийг Боловсролын сайдын зөвлөх Д.Гантулга мэдээлсэн. Монгол Улсад өнөөдрийн байдлаар 3000 гаруй багш дутагдалтай байгаа. Харин Засгийн газрын бодлого чиг үүргийн дагуух төрийн албан хаагчийн цомхотгол багшаас бусад албан хаагчдад хамаарч байгаа юм байна. 4000 орчим багш, албан хаагчдыг халах гэж байна гэдэг нь ташаа мэдээлэл бөгөөд 4000 гэдэг тооны 2000 гаруй нь сул орон тоо. Цомхотголд зөвхөн Боловсролын удирдлагын байгууллагууд орж байгаа аж. Чиг үүргийн давхардлыг арилгах, орон тоог цөөлөх шинэчлэлийн хүрээнд Боловсролын яам Дээд боловсролын газар, Цахим боловсролыг газар гэхчлэн 10 газартай байсан бол энэ тоог зургаа болгон цөөрүүлж байгаа юм байна.

ТӨРИЙН ӨМЧИТ 17 КОМПАНИЙГ ЦӨӨЛЖ, ЕСӨН КОМПАНИЙГ ТАТАН БУУЛГАЖ НЭГТГЭНЭ

Төрийн өмчийн бодлого, зохицуулалтын газрын дарга Б.Цэнгэлийн өгсөн мэдээллээр Монгол Улсын 2024-2028 оны үндсэн чиглэлд төрийн өмчит 20 компанийг багтааж, эдгээрээс Эрдэнэт үйлдвэр, Эрдэнэс Тавантолгой, Эрчим хүчний 11 компанитай ажиллах гэнэ. Төрийн өмчит компаниудаас 3.74 их наяд төгрөг төвлөрүүлэх боломжтой гэж үзэж байгаа бөгөөд ТӨХК-иудын засаглалыг сайжруулж, үр өгөөжийг нэмэгдүүлэх хүрээнд 17 компанийг цөөлөх, есөн компанийг татан буулгаж нэгтгэх саналыг Засгийн газарт танилцуулсан байна. Тэрбээр "Тайшир болон Орхон-Сэлэнгийн цахилгаан станцуудыг нэгтгэхийг санал болгосон Төрийн өмчит компаниуд толгой болон охин компаниудтайгаа нийлээд нийт 109 байсныг 87 болгон бууруулах төлөвлөгөөтэй байна. ТӨХК-иудын захирлуудын цалин хамгийн өндөр нь сарын 30 сая төгрөг байна. Тиймээс үндсэн цалин нь өндөр биш үр дүнгийн урамшуулал нь өндөр байлгах өөрчлөлтийг хийнэ. Гүйцэтгэлээр урамшууллыг үнэлэх талаар судалгаа дуусах шатандаа орсон. Тухайлбал, Эрдэнэс Монгол, Хөдөө аж ахуйн биржийн захирлуудын цалин харьцангуй өндөр байна. ТӨХК-иудад ойролцоогоор 59 мянган хүн ажиллаж байна. Үүний цаана олон хүний амьдрал бий. Тиймээс ТӨХК-иудад ялгамжтай бодлого явуулна. Хамгийн гол нь чиг үүргийн давхардал, орон тооны асуудлуудыг анхаарч ажиллана. Ингэснээр зардлыг хэмнэх боломжтой гэж үзэж байна" гэсэн юм.

УЦУОШГ 171 АЖИЛТНАА ЦОМХОТГОСОН БАЙНА

Ус цаг уурын байгууллагын зарим ажилтнаа цомхотгох мэдэгдэл хүргүүлжээ. Тус байгууллага 21 аймгийн 318 суманд салбар, нэгжтэй. Нийт 1893 хүн ажилладаг. Эдгээрээс нийт 171 ажилтанд цомхотгол хийсэн аж. Төсвийн тодотголоор тус байгуулгын төсөв 80.4 тэрбум төгрөг байсныг 77.3 тэрбум төгрөг болгож бууруулсан. Түүнчлэн цомхотгол хийхдээ 21 аймгийн төвүүдээс санал авсан бөгөөд үүнд тусгай ажлын хэсэг ажилласан байна. Цомхотгол хийхдээ нэгдүгээрт анхан шатны ажилтны орон тоог цөөлөхгүй байх бодлого барьсан бөгөөд удирдах албан тушаалтны тоог цөөлөх буюу нэг төв гурван дарга хэлтсийн даргатай байсныг нэг болгож цомхотгосон. Мөн бүх төвүүд адилхан бүтэцтэй байх бодлого барьсан буюу бүгд ижил бүтэцтэй байхаар зохицуулалт хийсэн байна.

АГЕНТЛАГУУД ДОТОРХ ГАЗАР, ХЭЛТСИЙН ТООГ ЦӨӨЛCӨН

Засгийн газрын хэрэг эрхлэх газрын дарга С.Бямбацогтийн өгсөн мэдээллээр "Засгийн газрын 35 агентлагт 3353 орон тоо байсныг 9 хувиар бууруулж, орон тооны хязгаарыг 3052 болгож байна. Өөрөөр хэлбэл, агентлаг доторх газар, хэлтэс, тасаг, албадын тоог цөөлсөн. Чиг үүргийн давхардлыг арилгах зорилгоор нийт орон тоог 301-ээр багасгасан. Энэ өөрчлөлтийн үр дүнд даргын тоог 54-өөр цомхотгож, цалин хөлсний зардлаас 10 орчим тэрбум төгрөгийн хэмнэлт бий болно. Яамдын газар, хэлтсийн дарга, агентлагийн газар, хэлтсийн дарга нарыг цомхотгосноор 20 орчим тэрбум төгрөг, Үндэсний хороо, зөвлөлийг татан буулгаснар 40 орчим тэрбум төгрөг нийтдээ 60 орчим тэрбум төгрөгийн хэмнэлт бий болж байгаа. Засгийн газрын хэрэгжүүлэгч болон тохируулагч агентлагийн бүтцийг батлахдаа тодорхой чиг үүрэг баримталж ажиллахыг үүрэг болгож байгаа. Нэг дор 9 хувийн цомхотгол хийх биш үе шаттай хийх. Тэтгэвэрт гарч байгаа, ажлаас чөлөө авсан, ажлаас гарсан орон тоог цомхотгох. Зарим шаардлагагүй бүтэц дээр ахиу цомхотгол хийх боломжийг яамдын сайд, агентлагийн дарга нарт олгож байна. Мөн агентлагууд орлогч дарга, дэд даргатай байхгүй. Хуулиар заасан бол орлогч дарга, дэд даргатай байна. Хуулиар заагаагүй бол орлогч дарга, дэд даргатай байж болохгүй. Агентлагийн болон яамны чиг үүрэг давхцахгүй байх. Давхардалгүй, хийдэлгүй байх боломжийг бүрдүүлнэ гэсэн юм.