НИТХ-ын төлөөлөгч Ж.Энхжаргалангийн ажлын өрөөнд “Лайвчин” Д.Мөнх-Эрдэнэ очиж үймээн шуугиан дэгдээснээр нийгэмд талцал бий болов. Үймээн сүүлдээ ажлын өрөөнөөс хальж, Төв цэнгэлдэхийн зүлэг ногоон дэвжээнээ гарсныг яана. Үзүүр түрүүний бөх цаашаа юм болсон. Энд маргаад байх зүйл байхгүй л дээ. Юуны өмнө Д.Мөнх-Эрдэнийн хувьд Ж.Энхжаргалантай албан харилцаа үүсгээгүй. Албан өрөөнд нь дайрч орон доромжилсон. Ингэхдээ бүр захиалгатай гэмээр дайралтыг очихоосоо өмнө цахим орчинд хийж, маргааныг заавал олны анхааралд оруулах гэж хичээнэ лээ. Тийм ч учраас ам руугаа салаавч чихүүлж, дайруулсан Төлөөлөгч Ж.Энхжаргалан эр хүний хувиар хариу барьсан болов уу. Хэн ч ингэх байх. Ийм нөхцөлд ямар ч эр хүний гар явж л таарна.

Д.Мөнх-Эрдэнэ ял эдлэхээсээ өмнө Төрийн өндөр дээд албан тушаалтнуудын өрөөнд дайрч ороод салаавч гаргахаас эхлээд есөн зүйлийн авир гаргадаг. Харин цаадуул нь нээнтэгтэй учраас хариу үзүүлдэггүй. Тиймээс мань эр өөрийгөө ялж байна гэж хөөрнө. Цахим орчинд өнөөхийгөө “Үндэсний баатар” болгочихно. Үнэн хэрэгтээ ингэж хөөрч байгаад ял авчихсан ш дээ. Чимээгүй байсан бол Консул байхдаа өдүүлсэн хэргийг нь нам дарж болох л байсан.

Харин одоо албаа залгуулж явсан Төлөөлөгч ажлынхаа байран дээрээ буруутан болж, дайрч үймээн дэгдээсэн “Лайвчин” нь баатар болж байгаа юм уу даа. Энэ нийгэм хаашаа яваад байна вэ. Ёс зүйгүй аашилж, хууль зөрчсөн ялтан нь мандаад хууль ёсны ажлаа хийж яваа нь буруутан болж байна. Ер нь бол Ж.Энхжаргалан эцэг хүний хувьд хүүдээ хогийн цэг дээрээс байна уу, дайны цэг дээрээс байна уу хаанаас ч сургаал айлдах нь хэнд хамаатай юм.

Д.Мөнх-Эрдэнийн энэ удаагийн үйл явдал нь захиалгатай харагдана лээ. Хардах шалтгаан олон байна. Гэхдээ хамгийн том шалтгаан бол түүний төрсөн дүү УИХ-ын гишүүн Д.Цогтбаатар Хөгжлийн банкны Зээлийн хэлтсийн захирлаар ажиллахдаа албан тушаалын байдлаа урвуулан ашигласан хэрэгт холбогдсон. Гурван шатны шүүхээс гэм буруутайг нь тогтоосон байхад бүрэн эрхтэйгээ сууж л байна. Энэ нь АН-ын нөмөр нөөлөг, хуулийн цоорхой юм даа.

Одоогоор бол ахын ялын хугацаа дуусаагүй бол дүү нь хэзээ мөдгүй ял авахдаа тулчихсан, хоёулаа дээсэн дөрөөн дээр дэнжигнэж байгаа хоёр. Д.Мөнх-Эрдэнийн хувьд дүүгээ ялгүй авч үлдэхийн тулд яахаас ч буцахгүй байгаа. Харин АН-ынхан энэ мэт нөхцөл байдлыг ашиглан хогийн улс төр хийж байхыг үгүйсгэхгүй. Цахим орчинд гол төлөв НИТХ дахь АН-ын бүлгийн төлөөлөгчид Ж.Энхжаргалангийн эсрэг үзэж, “Лайвчин”-аа өмөөрч байгаагаас харагдана. Дүүгээ гэх ахын сэтгэлийг яалтай ч билээ. АН ч дөрөөлж чадаж байна. Д.Мөнх-Эрдэнэ ч дүүдээ АН-ын нөмөр нөөлөг хүсэж байна. Яах ч аргагүй юм даа. Миний хувьд энд хэн нэгний бурууг шүүх гэсэнгүй. Харин эр хүний хувьд хэлэхэд Төлөөлөгчийн салаавч зөв байсан шүү. Захын нэг галзуу солиотой “Лайвчин” ирээд салаавч өгч, өөдөөс дайраад байхад ямар ч эр хүн тэсэхгүй. Харин ч “алаад” өгөх байсан юм.

С.Данзан