Тус тусынхаа хайрцаг саванд тарчилж хэвтдэг Ах намын сураггүй шахам төлөөлөл, фракц бүлэглэлийнхэн “Намын Их хурлыг яаралтай зарлан хуралдуулж, намынхаа даргыг сонго. Энэ хэдэн даргад өртэй биш ямар гай л байна” гэх зэргээр овоо цор цор дуугарах болов. Тэр нь Дундговь аймагт удаа дараа нэр дэвшээд “гөлөөг” ч гэж тоогдоогүй “Ардын хүч” Төрийн бус байгууллагын тэргүүн гэх Б.Амарсанаа, Увс аймгийн МАН-ын дэд дарга гэх “золбин” шахуу сэтэртэй С.Анхбаяр гэгч нөхөд дажгүй дуу чимээ орчихсон байхыг бодоход цаана нь хэн нэгэн галыг нь өрдөж байгаа хэрэг. Түүнээс тэд хайрцаг савнаасаа гарах байтугай цухуйх ч эрхгүй нөхөд л дөө. Товчхондоо тэдэнд өөрийнхөөрөө дуугарах толгой байхгүй явж ирсэн гэхэд болно.

Тэгэхээр унасан цухлаа барж ядан яваа Л.Оюун-Эрдэнэ галыг нь өрдөж байна уу. Намын даргын суудлаар Ерөнхий сайдаа батжуулах гэсэн Г.Занданшатар нарын талаас өрдөв үү гэдэг нь цаг хугацааны л асуудал. Шуудхан хэлэхэд Л.Оюун-Эрдэнийн дохио зангаагаар явж байгаа бол мөддөө өөд нар харахгүй байх. За энэ ч яахав. Анзаарч байхад Ерөнхий сайд Г.Занданшатарын үг хүсэл бололтой. Тэр ч намаа авахаар яарч байгаа нь аргагүй байх.

Гагцхүү хэвлэл мэдээллийн хэрэгсэл, шинжээчдийн хэлж байгаагаар наяад оныхон ах нараас эрх мэдлээ бүрэн авахаар бэлтгэж эхэлсэн гэх. Ингэхдээ УИХ-ын дарга Д.Амарбаясгаланг намын дарга, Ерөнхий сайдад зүтгүүлж байгаа гэх мэдээлэл байна. Энэ бол худлаа. Д.Амарбаясгалан Ерөнхийлөгч У.Хүрэлсүхийн өмнүүр гараа өргөөд гүйх ямар ч боломжгүй болчихсон хүн. Харин Л.Оюун-Эрдэнэ өөрөө шаансгүй болчихсон учраас Д.Амарбаясгаланг шордож байх магадлал бол бий. Арга ч үгүй. Д.Амарбаясгалангийн хайрцагандаа хийгээд орхисон бүлэг фракц нь МАН-д одоо ч эзнийхээ дохиог хүлээн байгаа учраас Л.Оюун-Эрдэнэ түүнийг ашиглах гэсэн хэрэг.

Д.Амарбаясгалан тэгэж Л.Оюун-Эрдэнийн үгэнд амархан орчих гайхал биш. Хар нялхаасаа ах нартай шатар нүүчихсэн хашир эр. Нөгөө талаар Д.Амарбаясгаланд У.Хүрэлсүхийн өөдөөс дуугарахгүй байх маш олон шалтгаан бий. Маш ноцтой шалтгаан ч цөөнгүй бий. Л.Оюун-Эрдэнэдээ тийм л туслах байсан бол түүнийг унаж байхад нь хайрцаглаж орхисон “эд бараа”-наасаа нэгийг нь ч болтугай цухуйлгана биз дээ. Огт хөдлөөгүй. Энэ утгаараа Л.Оюун-Эрдэнэ МАН-д нөлөө тогтоох нь бүү хэл ирээдүйн улс төр нь ч бүрхэг болчихсон. Болох ч юу байхав, дуусчихсан нөхөр. Тэр намынхаа хурлыг зарлахгүй цаг хожоод ч байгаа юм биш. Яахав, бага сага тохиролцоо хийж үлдэх гэсэн санаа байхаас угаасаа цаг хугацаа нь ингэж л таарна.

Тиймээс Ерөнхий сайд Г.Занданшатар УИХ-ын дарга Д.Амарбаясгалантай уулзаад аль эрт засгийн болон бусад квотыг нь өгчихсөн байгаа. Д.Амарбаясгалан ч Ерөнхийлөгч У.Хүрэлсүх дээр өөрөө гүйж ороод “Таны хүнийг дэмжиж байгаа” гэдгээ шивнэчихсэн. Өнөөдөртөө У.Хүрэлсүхийн өмнүүр гишгих аавын хүү МАН-д нэгээхэн ч үгүй. Тэр ч бүү хэл ирээдүйд Ерөнхийлөгчийн суудлыг Ерөнхий сайдын суудлаар солих тухай сэлүүхэн бодож яваа эр. Тиймдээ ч Г.Занданшатарыг Ерөнхий сайдад явуулж, хоёр гуравдугаар дүрийн байрыг солих төлөвлөгөө нэгэнт зурагдчихсан. Ирээдүйн Ерөнхийлөгчийнхөө өрсөлдөгчдийг ч чуулганы индэр дээрээс хэрхэн “намнаж” байгааг харсан биз дээ. Мөн МАН-ын Ерөнхий нарийн бичгийн даргаар Я.Содбаатар ажиллаж байгаагийн хувиар Ерөнхийлөгчийн төлөөний шинэхэн даргынхаа ирэх замыг зурайлгаж, олбогыг нь засаж байгаа.

Товчхондоо, албан ёсоор МАН-ын Их хурал болж, Г.Занданшатар бэлдсэн ёсоор чамгүй өндөр хувийн саналаар МАН-ын дарга болно. Ерөөсөө МАН дотор бусдын ярьж хэлж бичиж байгаа шиг ямар ч зодоон болоогүй. Г.Занданшатар намын дарга болдгоороо болж, Д.Амарбаясгалан түүнийг дэмждэгээрээ дэмжинэ. Ер нь МАН-д хэзээ зодоон болж байсан юм, “дүрэм”-ээрээ л явна.

С.Ууганбаяр