УИХ-ын Төрийн байгуулалтын байнгын хорооны дарга Ц.Сандаг-Очирын мэдээллээр нэр бүхий гишүүдийн өргөн мэдүүлсэн Ерөнхий сайд Г.Занданшатарыг огцруулах тухай саналыг УИХ-ын Төрийн байгуулалтын байнгын хороогоор ирэх Баасан гариг /2025.10.10/ -аас хэлэлцэх болжээ. УИХ-ын дэгийн тухай хуульд зааснаар Ерөнхий сайдыг огцруулах санал тавьсан бол УИХ долоо хоногийн дотор хэлэлцэж, 10 хоногийн дотор багтаан шийдвэр гаргана гэж заасан юм. Иймээс Засгийн газрын танхим тогтвортой ажиллах эсэхийг энэ долоо хоногоос эхлэн дэнслэх болж байна.
УИХ 126 гишүүнтэй бөгөөд 64-өөс дээш гишүүн Ерөнхий сайдыг огцруулах саналыг дэмжвэл Засгийн газар огцорно. Одоогоор Ерөнхий сайдыг огцруулах саналыг 30 гаруй гишүүн дэмжээд байгаа.
УИХ-ын даргын дэргэдэх зөвлөл өнгөрсөн долоо хоногт хуралдаад Хууль зүй дотоод хэргийн сайдаар Б.Энхбаярыг томилуулах тухай асуудалтай танилцахаар хэлэлцэх асуудлын дараалалд оруулсан. Иймээс УИХ-ын гишүүн Б.Энхбаяр сайд болж, тангараг өргөх эсэх ч энэ долоо хоногийн бас нэгэн анхаарал татах асуудал болж байгаа юм.
Ерөнхий сайд Г.Занданшатар нүүрсний хулгайтай тэмцэхийн тулд УИХ-ын гишүүн Б.Энхбаярыг Хууль зүй дотоод хэргийн сайдаар томилж байна гэдгээ мэдэгдээд байгаа билээ.
Сэтгэгдэл ()
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!