Үндсэн хуулийн Цэцийн их суудлын хуралдаан өнөөдөр 09:30 цагт товлогдсон бөгөөд Ерөнхий сайдыг огцруулсан асуудал нь Монгол Улсын Үндсэн хуулийн холбогдох заалтуудыг зөрчсөн эсэхийг дэнсэлнэ. Дээрх асуудлаар Ерөнхий сайдын үүрэг гүйцэтгэгч Г.Занданшатар өнгөрсөн долоо хоногт Цэцэд гомдол гаргасан юм. Тодруулбал, УИХ-ын Төрийн байгуулалтын байнгын хороо аравдугаар сарын 16-нд үргэлжлүүлэн хуралдаж, П.Сайнзориг нарын гишүүдээс гаргасан Ерөнхий сайдыг огцруулах тухай саналыг хэлэлцээд “Ерөнхий сайдыг огцруулахыг дэмжихгүй” гэдэг шийдвэр гаргасан. Байнгын хорооны хуралд 22 гишүүн оролцсоноос 19 нь Ерөнхий сайдыг огцруулахыг дэмжихгүй гэж кноп дарсан. УИХ-ын чуулганы нэгдсэн хуралдаанаар дээрх асуудлыг хэлэлцэн санал хураахдаа “Төрийн байгуулалтын байнгын хорооны дэмжээгүй саналыг дэмжье” гэсэн саналын томъёоллоор санал хураасан юм. Өөрөөр хэлбэл, Байнгын хорооноос оруулж ирсэн саналын томъёоллоор санал хураасан нь Үндсэн хуулийг ноцтой зөрчил үйлдэл болсон гэж гомдол гаргагч тал үзэж байгаа.

Харин УИХ-ын Төрийн байгуулалтын байнгын хорооны дарга Ц.Сандаг-Очир тэргүүтэй гишүүд “Ж.Эрдэнэбатын Засгийн газрыг яг энэ томъёоллоор санал хураалгаж огцруулж байсан. Хууль зөрчөөгүй” гэж тайлбарлаж буй. Иймээс Цэц эл асуудлыг хэлэлцэх юм. Мөн хуульчдын зүгээс Ерөнхий сайдыг огцруулах саналын томъёолол нь буруу зөрчилтэй байсны зэрэгцээ ирцэд орчихоод саналаа өгөөгүй гишүүдийг огцруулах саналд ашигласан нь УИХ-ын дэгийн тухай хуулийг зөрчсөн гэдэг асуудал ч давхар хөндөж байгаа. Учир нь, УИХ-ын чуулганы нэгдсэн хуралдаанаар Ерөнхий сайдыг огцруулах саналыг хэлэлцэхэд 64 гишүүн дэмжсэн бол Засгийн газар огцорсонд тооцно. Гэтэл УИХ-ын чуулганы аравдугаар сарын 17-ний өдрийн хуралдаанаар Ерөнхий сайд Г.Занданшатарыг огцруулах кнопыг 52 гишүүн дарсан нь Үндсэн хуульд заасан 64 гишүүний босгыг даваагүй. Ирцэд бүртгүүлчихээд саналаа өгөөгүй 19 гишүүний саналыг Ерөнхий сайдыг огцруулахад ашигласан нь Үндсэн хуулийн ноцтой зөрчил үүсгэж байгаа” гэж тайлбарлаж буй. Иймээс Ерөнхий сайдыг огцруулсан үйл ажиллагаа Монгол Улсын Үндсэн хуульд нийцсэн эсэх асуудал ийн өнөөдөр Цэцээр орж, сүүлийн хэдэн өдөр улстөрчдийг талцуулж байгаа энэ асуудалд цэг хатгах болж байна.