Эдгээр залуус бараг нэгэн үед МАН-ын босгоор алхаж, нэгэн үед хойно өмнөө орон улс төрийн өндөр дээд алба хашсан. Өөрсдийнх нь улс төрийн замнал, хувь хүний мөн чанар гэхээсээ илүүтэй шунал тачаалаасаа болон улс төрийнхөө карьерыг арчуулсан нөхөд. Эндээс Н.Номтойбаяр мөнгөтэй тулдаа улс төрд эргэн ирэв. Г.Тэмүүлэн шуналгүй тулдаа алгуурхан өгсөж явна. Н.Цэрэнбат хэнэггүй тулдаа төрийн өмчит компанийн захирлын алба хашиж явна. Бусад нь улс төрд эргэн ирнэ гэхэд тун хэцүү.

Л.Оюун-Эрдэнэ Ерөнхий сайд байгаад бууж, одоо аавын хаалга татахдаа тулав

Хэрвээ тэр хүрээ хаяагаа тэлж, Х.Баттулга нарыг налалгүй ах нарынхаа үгийг дагаж байсан бл өдийд Ерөнхий сайдаараа ажиллаж байх байв. Одоо түүнийг Ерөнхий сайдаар ажилласан таван жилийн хугацаанд хийрхэсэн хэрэгжээгүй олон төсөл нь дарж “ална”. Яг энэ үед олон ч хууль бус зүйл нь ил болж байна.

Ж.Мөнхбат Засгийн газрын хэрэг эрхлэх газрын дарга байгаад гадагшаа зугтаав

МАН 33:32 хуваагдах үед тэр 32-ын бүлэгт туг нь болж, ах нарынхаа өөдөөс салаавч гаргаж байв. Гэвч Л.Оюун-Эрдэнээс эхлээд Засгийн газарт орж ажиллахыг санал болгосон ч тэр ажиллаагүй. Шийр заах гэж оролдоод сүүлдээ арга буюу гувшсаны эцэст шоронгүй салж, гадагшаа зайлсан. Хэрэв ахынхаа үгэнд орсон бол өнөөдрийн энэ дуулиан дундуур УИХ-ын дарга, Ерөнхий сайдын аль нэгэнд нэр нь явж байгаа.

Н.Цэрэнбат Байгаль орчны сайд, УИХ-ын гишүүнээс захирлын албанд

Энэ нөхөрт шунаж давраад байсан зүйл байхгүй. Албан тушаалд ирж үзээгүй залуу сайдын суудал дээрээс туг мандуулах гэж үзээд унасан. Ер нь бол сайдын албыг бэлэг тэмдэг төдий хашиж байгаад явсан. Уналаа гэж уйлсангүй, уурласангүй. Хэнэггүй нөхөр. Одоо “Эрдэнэс Оюу Толгой” ХХК-ийн Гүйцэтгэх захирлаар ажиллаж байна.

Н.Номтойбаяр ордноос шоронд, шоронгоос ордонд морилов

Цагтаа тэр Нийгмийн хамгаалал, хөдөлмөрийн сайд, УИХ-ын гишүүн байгаад аанай л ах нарынхаа өөдөөс хэдэрлэсэн хэргээр шоронд морилж, өдгөө ордонд дахин морилов. Хэрвээ Н.Номтойбаяр мөнгөтэй айлын хүү байгаагүй бол эргэн их улс төрд ирэх ямар ч шаанс байсангүй. Мөнгөтэй айлын хүүхэд учраас жагсаалтын гуравт эрэмбэтэй нам худалдан авч, эвсэл байгуулж байгаад тэр улс төрд эргэн ирэв.

Д.Амарбаясгалан УИХ-ын даргын суудлаас “Бор тээг”-ийн ордоор боомилуулах байх

Тэр МАН-ын Бага хурлын өмнө ах нарынхаа үгэнд орж тохиролцох байсан юм. Өөрөөр хэлбэл ах нар засгаа, намын даргаа ав, би дэмжиж ажиллая. Харин би УИХ-ын даргын суудалдаа байя гэсэн бол өдийд үймээн ч байхгүй. Тэр өндөрлөгтөө заларсаар байх байв. Гэтэл МАН-ын даргын төлөө шунаж, өрсөлдөөд ах нараа навс ялаад, эргээд үгэнд орохгүй үзэх гэсэн оролдлого нь түүнийг УИХ-ын даргын суудлаас буулгаад зогсохгүй “Бор тээг” хэмээх хавтаст хэрэг нээхэд бэлэн болгочихож.

Г.Тэмүүлэн гай ч үгүй гавъяа ч үгүй УИХ-д суудал бөглөн сууж байна

Эдгээр нөхдөөс хараад байхад Г.Тэмүүлэн албан тушаал мөнгөнд хэтэрхий шунаагүй нь өөрийнхөөрөө ямар нэг ял зэмгүй УИХ-ын гишүүнээр гурав дахь удаагаа сонгогдон хоёр ч байнгын хороо сэлгэн даргаар ажиллаж байна. Түүнд өсөх ирээдүй ч байна.

Б.Баярмагнай арга ядахдаа МАН-д жигүүр байгуулж явна

Мөн л залуусын адил 2001 онд МАН-ын дэргэдэх Оюутны холбооны Ерөнхий нарийн бичгийн даргаар улс төрд хөл тавьсан нөхөр богино хугацаанд Сүхбаатар дүүргийн Засаг даргаар ажиллаж, хоёр ч удаа Нийслэлийн Иргэдийн төлөөлөгчдийн хурлын төлөөлөгчөөр ажиллаж байгаад 2020 онд Батлан хамгаалахын дэд сайд байгаад шувтарсан. Одоо ямар сайндаа МАН дотор жигүүр байгуулан, горьдлого тээж явахав.