Ах намынхан дундаа зодолдож, намынхаа зовлонг улсын зовлон болголоо. Хөндлөнгөөс АН-ынхан хоёр хуваагдан “үзэж”, төрийн ажил ч гацлаа гэж байна. Үнэн хэрэгтээ МАН ч дундаа “үзсэн” хэрэг биш, АН ч хөндлөнгөөс хоёр хуваагдан ”үзээд” байгаа зүйл биш.

Ердөө л “Эм Си Эс” Ж.Оджаргал, “Бодь интернэшнл” Д.Баясгалан нарын зодоон болж байна. Тэдний гар хөл болсон улстөрч, бүлэглэлүүдийн эрх мэдлийн төлөөх зодоон Төрийн ордонд өрнөж, Төрийн ажил гацаан, ард түмний нуруун дээрх ачааг нэмж байгаа хэрэг.

“Эм Си Эс”-ийн эрхийг хамгаалагч Ерөнхий сайд Г.Занданшатар тэргүүтэн “Бор тээг”-ийн уурхайгаас эхлээд төнхөж, өдгөө “Бодь интернэшнл”-ийн 39 нууц гэрээг ил болгосноор үргэлжилж байгаа гэх боловч бүх гэрээ өөрийг нь УИХ-ын дарга, ҮАБЗ-ийн гишүүн байхад хийгдсэн гэрээ байх. Нөгөө талаас “Бодь интернэшнл”-ийн эрхийг хамгаалагч “Жэнко” Х.Баттулга, УИХ-ын дарга Д.Амарбаясгалан, Л.Оюун-Эрдэнэ нар “Эм Си Эс” намынхны тендер, хулгай луйврыг ч дэлгээд шуугиж байна.

Энд ард түмний төлөөх тэмцэл өрнөөгүй, энд төрийн тогтвортой байдал, системийн төлөөх тэмцэл өрнөөгүй. Гагцхүү ард түмний баялгийг мэдэлдээ авсан дээрэмчин гурппийн хөрөнгөөр Төрийн өндөр дээд эрх мэдэлд байх гэсэн зодоон л өрнөж байгаа.

Тиймдээ ч бүхий л хугацаанд ард түмний баялгийг дээрэмдсэн “Эм Си Эс”-ийн мэдэлд стратегийн ямар үнэ цэнтэй ордууд байна вэ. Үүгээрээ улстөрчдийг тэжээж, төрийн эрхийг аль нэг нам бус шууд бус утгаараа энэ групп базаж байна гэхэд болно. Энэ группээс мөнгө аваагүй улстөрч парламентад тун цөөн байгааг баримтаар дэлгэж л байсан.

Нөгөө талд байгуулагдсан цагаасаа ард түмний боломжийг хулгайлж, төрийн эрхэнд шууд бус оролцсоор ирсэн “Бодь интернэшнл” группэд оролцоогүй зүйл гэж үгүй.

Монгол Улсад зарлагдсан бүхий л тендерийг хамаж, төсвийн мөнгө угаана. Гэхдээ гүйцэтгэсэн ажил нь байнга хулгайн замаар явж, хэрэгтэй зүйл болдоггүй. Сүүлийн тоотой баримт дурдахад Х.Баттулга нь дэмжин, мухар төмөр зам барьж, Монголыг асар их өрөнд оруулсан. Үүнээс үүдсэн хил холболтын Харбины гэрээ гэх аймшийн луйвар хийгдсэн. Тэдний тендер, боломж хулгайлж аваад хийсэн ажил нь эцэст нь дандаа ийм шавар намагт хутгаж, улс эх орны эрх ашигт харшилсан байдаг.

Урт цагааны ногоон байгууламжийг ч бусдад өгөлгүй булааж аваад 44 тэрбум төгрөгөөр хийсэн, одоо байгааг нь хар. Л.Оюун-Эрдэнэтэй нийлж, 308 тэрбумаар барьсан Тавантолгойн нүүрс ачих логистикийн төвийг нь хар. Ашиглалтад орох нь бүү хэл нэг ч хөдлөөгүй байж эвэдрчихсэн. Бас л бусдаас булааж авсан Бөөрөлжүүтийн цахилгаан станцийн төслийг хар. Хугацаанд нь дуусгалгүй, хөрөнгө оруулалт байхгүй гээд суучихсан. Эцэст нь арга буюу хотоос бонд босгуулаад 300 тэрбум төгрөг аваад алга болсон.

Энд МАН хоёр талцан, Г.Занданшатар, Д.Амарбаясгалан нарын нөхөд хоорондоо үзээд байгаа мэт харагдах ч цаана нь төрийн эрхийг дам авах гэсэн “Эм Си Эс”, “Бодь” хоёрын зодоон л өрнөж байна. Улстөрчид нь ч тэдний мөнгөөр угжуулж ирсэн нөхөд, ахиад мөнгөөр нь эрх мэдэлд байж тэднийхээ эрх ашгийг хангах гэсэн улайрал явагдана.

Энэ нь тэдний ч мөнгө биш, ард түмний баялгийг дээрэмдэж авсан мөнгөөр Төрийн эрхийг худалдан авах ажиллагаа явж байна.