Нэг, Хоёрдугаар эмнэлгийн дарга, Эрүүл мэндийн яамны Төрийн нарийн бичгийн дарга, Сайдын зөвлөх, нийслэлийн Эрүүл мэндийн газрын дарга зэрэг олон албан тушаалд ажиллаж, тухайн байгууллага бүрийнхээ ажлыг унагааж самарч ирсэн Б.Бямбадорж дахин нийслэлийн Эрүүл мэндийн газрын даргын үүргийг түр орлон гүйцэтгэгчээр ирсэн цагаас хойш энэ айлын хөл толгой нь мэдэгдэхээ болилоо. Б.Бямбадорж тус газрын даргын үүргийг Түр орлон гүйцэтгэгчээр долоодугаар сард ирсэн ч ашиг сонирхлын зөрчилтэй, хаа явсан газраа балаг тарьж явдаг учраас Хотын дарга Х.Нямбаатар ажлаас нь чөлөөлжээ.

Түүний оронд Д.Сайнхүүг томилж, Д.Сайнхүү нь томилогдсон даруйд Эмнэлгийн тусламжийн хэлтсийн дарга Б.Батцоожийг ажлаас нь халж, Хотын дарга Х.Нямбаатар үдээс хойш дахин захирамж гарган, Б.Батцоожийг Эрүүл мэндийн газрын даргын үүрэг гүйцэтгэгчээр томилж гээд юм юм болов. Тиймээс Тамгын газраас ажил хүлээлцэхээр очиход Б.Бямбадорж нь “Би эргэж ирнэ” гээд өрөөгөө лацдаад ор сураггүй болсон бол Д.Сайнхүү нь байгууллагын тамга аваад зугтжээ. Үүнээс үүдэн тус газрын ажилчин, алба хаагчид цалин цавгаа авч чадахгүй, зээл хуй нь нэхэгдсэн, бүхий л ажил гацсан байдалтай байгааг дуулгаж байсан.

Харин Төрийн албан зөвлөлөөс нийслэлийн Эрүүл мэндийн газрын даргын сонгон шалгаруулалтад өрсөлдөх нэрсийг зарлачихаж. Үүнд олон газрыг будилуулсан Б.Бямбадорж, нийслэлийн Эрүүл мэндийн газрын Эмнэлгийн тусламжийн хэлтсийн даргаар ажиллаж асан Б.Батцоож, Хан-Уул дүүргийн Эрүүл мэндийн төвийн дарга Н.Наранбаатар, Эм, эмнэлгийн хяналт зохицуулалтын хэлтсийн дарга Б.Одгэрэл, Ц.Идэрбат, Ж.Отгонболд гэсэн зургаан хүн сонгон шалгаруулалтад орох юм байна.

Томилогдож очсон газар бүрдээ балаг тарьж самарч явдаг Б.Бямбадоржийг МАН-ын Ерөнхий нарийн бичгийн дарга Я.Содбаатар байнга өөд татаж ирсэн ч тэр байнга түүний нэрийг хөөдөж ирсэн. Тиймдээ ч өчнөөн өргөж тэтгүүлж очсон ч ажил унагааж, авлига, албан тушаалын гэмт хэрэг үйлдэж явдаг Б.Бямбадоржийг Түр орлон гүйцэтгэгчээр томилох нь бүү хэл Сонгон шалгаруулалтад ч оролцуулахгүй байх хэрэгтэй.

Тэр өдгөө сонгон шалгаруулалтад тэнцэхгүйгээ мэдэн, өнөөх л Өвөрхангайн нэр нөлөө бүхий хүмүүсээс гуйж гувшиж, Төрийн албаны зөвлөлд хүртэл нөлөөлөхийг оролдож байгаа нь ойлгомжтой. Бүхий л газарт балаг тарьж ирсэн энэ нөхрийг тэтгэвэрт нь суулгаж болдоггүй юм уу. Зөвхөн хамт сонгон шалгаруулалтад оролцож байгаа залуусыг харахад л хангалттай. Бүгд салбартаа ажиллаж туршлага хуримтлуулсан, нэр цэвэр хүмүүс байна. Тэгэхээр нэг муу авлигачинг дахин дахин томилж, эрүүл мэндийн салбараа самруулж байхаар залуусаа дэмжих хэрэгтэй юм.

Ямар сайндаа НИТХ-ын төлөөлөгч З.Төмөртөөмөө “Б.Бямбадорж та Монголын эрүүл мэндийн бүх салбарт ажиллалаа. Эрүүл мэндийн яамны Төрийн нарийн бичгийн дарга, нэг, хоёрдугаар эмнэлгийн дарга, газрын дарга, нийслэлийн Эрүүл мэндийн газрын дарга, одоо ахиад орж ирж байна. Энэ бол арвин туршлага, амьдрал дээр хэрэгжүүлмээр байна. Энэ танхимд гоё юм ярьж болно. Тэнд хүүхдүүд өвдөж байна. Та одоо менежмэнтээ өөрчил” хэмээн сануулж байхав дээ. Түүний тухай тендерээс авлига нэхсэн, хувийн эмнэлэгт завшсан, мэргэшсэн хамт олныг хоорголон ажлаас нь халсан гэх мэт олон дуулиан бий.

Songolt.mn