Морь цоллож, бөх засаж, үндэсний уламжлалт өв соёлыг тээхийн зэрэгцээ Монголын утга, уран зохиолын талбарт үндэсний өвөрмөц хэв маяг бүхий уран бүтээлээрээ хүч түрэн орж ирсэн Балдангийн Баярмөнхийн авьяас билэг, хөдөлмөр зүтгэлийг үнэлж, Хөдөлмөрийн хүндэт медаль хүртээжээ.

Б.Баярмөнх найрагч дунд сургуульд байхаасаа шүлэг зохиол оролдон сонирхож эхэлсэн цагаас хойш “Он цаг”, “Аялагхан”, “Зөрүү орчлон”, “Миний л”, “Цагаан сүүдэр” зэрэг уран бүтээлийн номоо уншигч олноо өргөн барьсан Монголын зохиолчдын эвлэлийн гишүүн яруу найрагч юм. Тэрбээр яруу найраг, өгүүлэг бичихээс гадна үндэсний уламжлалт өв соёлыг тээж яваа учраас Биеийн тамир спортын тэргүүний ажилтан, Соёлын тэргүүний ажилтан, Үндэсний бөхийн Улсын засуул, Аймгийн Ахлах тайлбарлагч цолтой найрагч.

Тэрбээр анх шүлэг зохиол оролдож эхэлснээ ийн дурссан байдаг. Тэртээх 1988 онд Б.Баярмөнх дунд сургуулийн сурагч байж. Энэ үеэр Өмнөговь аймгийн Булган суманд Улсын баатар Т.Дүүдээ, Д Данзанваанчиг нар хүрэлцэн ирж хүүхэд багачуудтай уулзаж, яриа таниулга хийсэн байна. Энэ үеэр хоёр баатар шууд дайны сэдвээр шүлэг бичиж унших уралдаан зарлаж, хүүхдүүдээс чадах уу гэж асуухад нөхөр шууд гараа өргөсөн гэдэг. Ингэж анх шүлэг бичиж, тэр наадамд түрүүлж, хоёр баатраас 12 өнгийн харандаа авч байх үеэр хоёр баатар “Нүдэндээ галтай хүү байна” гэж ихэд өхөөрдөж байсан гэдэг.

С.Баяр