-НЭГ МЭДЭХЭД ДАРГА НАР НЬ ГАР БАРИАД ТОХИРОЛЦОНО, МАРГААШ НЬ ДАРГА НАРЫНХАА ДУУЛИАНААР ХОЁР ТАЛ БОЛЖ МУУДСАН НӨХӨД ХЭРХЭН ЯАЖ НЭГ САВАНД БАГТАХ БОЛ ...

Нэгэн цагт “Эсгий гэрт дэлхий хуваах” тухай хэлэлцэж явсан Их Монголын үр сад тансаг ордон, дөрвөн ханын дунд юу эсийг хэлэлцэх билээ. Ойрын эх сурвалжийн хэлж байгаагаар Л.Оюун-Эрдэнэ, Д.Амарбаясгалан нар МАН-ын даргад санаархал байсан хэдий ч үнэнд гүйцэгдэж, У.Хүрэлсүхийн өмнө бөхийхөөс өөр аргагүй нөхцөл байдал үүссэн байна.

УИХ-ын дарга Д.Амарбаясгалан “Ерөнхийлөгч намын даргад өрсөлдөхөө боль, болихгүй бол хэрэг үүсгэнэ” гэсэн хэмээн мэдээлж байсан нь оргүй зүйл биш бололтой. Ерөнхийлөгч маань өөрийнхөө зургаар явахын тулд хоёр дүүгээ айлгаад амжжээ. Айх зүйл ч олонтой хүмүүс жаал сүржигнэж байгаад нэрээ татах нь ойлгомжтой боллоо. Хоёр дүүд хятадтай хийсэн нууц гэрээнээс эхлээд олон мега төслөөр дамжуулсан мөнгөний асуудал, Бор тээгийн орд газар гээд юу эс мундах билээ. Хангалттай бөхөлзөх шалтгаан мөн.

Гэхдээ үүний цаана хачирхалтай тохиролцоо явсан гэдгийг эх сурвалж дуулгаж байна. Ерөнхийлөгч У.Хүрэлсүх дүү нараа бөхийлгөж авсан учраас Г.Занданшатар нэгэнт МАН-ын дарга болно. Харин Ерөнхийлөгчийн сонгууль болоход Ерөнхий сайд Г.Занданшатар Ерөнхийлөгчид нэр дэвшиж ялалт байгуулна. Түүний оронд МАН-ын дарга, Ерөнхий сайдаар Д.Амарбаясгалан очно, У.Хүрэлсүх өөрөө УИХ даргаар суух романтик төлөвлөгөө зурсан гэдгийг дуулгалаа. Удахгүй болох МАН-ын даргын сунгаанд ялихгүй нэг дүр оруулж ирээд унагаах юм байна. Юутай ч тансаг ордон, дөрвөн ханын дунд дэлхийг биш юмаа гэхэд Монгол Улсыг хуваан захирах ирээдүйн романтик төлөвлөгөө ийн зурагджээ. Намын даргын асуудал Их хурал хүртэл ч явахгүй бололтой, Бага хурлаар шийдвэрлэх нь ойлгомжтой болж байх шиг. Нэгэнт тохирчихсон зүйлийг Их хурал хүртэл сунжруулаад ч яахав.

Монголын улс төрийг 2017 оноос арваад жил эзэгнэж байгаа У.Хүрэлсүх ноёрхлоо ийнхүү сунгаж байгаа бололтой. Ингэхдээ дал, наяад оны төлөөлөлтэй хуваан эзэгнэх төлөвлөгөө зуржээ. Арга ч үгүй, У.Хүрэлсүх 2017 оноос хойш гарч ирж загначихаад, намын бүхий л томилгоо, үйл ажиллагаанд шууд бус утгаараа ноёлж байгаа учраас намын шат шатанд У.Хүрэлсүхэд дургүйцэх болсон учраас ийн тэгшитгээд нэг үзэх гэсэн санаархал байх. Тиймээс Ерөнхийлөгчийн хувьд “Шүдгүй арслан” болж үлдэх зовлон байгаа учраас ийн тохиролцоход хүргэсэн болов уу. Ямар сайндаа л БНХАУ-д болсон уулзалт, арга хэмжээнд М.Энхболд, Н.Энхболд, Сү.Батболд гэх намын хуучин кадруудыг хуу хамаад очиж байхав дээ. Ерөнхийлөгч хуучин кадруудтай зүгээр ч нэг Цагаан хэрмийн цаана хундага тулгаагүй нь ойлгомжтой.

Яахав, 2027 оны Ерөнхийлөгчийн сонгуульд МАН-аас Г.Занданшатараас өөр дүр тун ховор байж мэднэ. Ядахад дав дув гээд байхгүй номын хүн. Энэ хэрээр хэтдээ МАН-ыг базаад засаглаад явах хүн ч Д.Амарбаясгалангаас өөр олон байхгүй. Ингэж бодохоор романтик ч гэсэн байж болох л төлөвлөгөө. Олон нийт л МАН-ыг дунд нь зодолдуулж, өрсөлдүүлээд байгаа болохоос биш хөшигний цаана ийм л тохиролцоо явж, төлөвлөгөө зурж байна. Хэдхэн дарга нар шийдчих зүйлийг гишүүд дэмжигчид нь гудамжинд гарган, улс нийгмийн хэрүүл болгон талцаж байгаагаас өөрцгүй. Нэг мэдэхэд дарга нар нь гар бариад тохиролцоно, маргааш нь дарга нарынхаа дуулианаар хоёр талцсан нөхөд яаж нэг саванд багтах юм бол...

Гэхдээ У.Хүрэлсүх Д.Амарбаясгалан нарыг нэг мөр дарж авахаар шийдсэн ч байх талтай. Ямартай ч Д.Амарбаясгалангийн муу муухай бүхний гар хөл болсон МАН-ын Нарийн бичгийн дарга Ц.Чулуунзагдыг бариад хорьчихож байгаа нь Спикерт өгч байгаа томоохон сануулга байж таарна. Гагцхүү Спикерээ нэг мөр “нухаж” авах уу, нэрийг татуулаад суудалд нь үлдээх үү гэдэг ч бас л нэг асуудал. МАН дотоодод ийм төлөвлөгөө өрнөж байна. Одоогийн байдлаар зураад байгаа тэдний романтик схем нь хэтдээ МАН-ын эв нэгдэл, ирээдүйн ялалтад ч эерэг нөлөөлөл авчрах магадлалтай юм.

С.Ууганбаяр