Б.ДЭЛГЭРСАЙХАНЫГ ОГЦОРУУЛАХААС МОНГОЛ УЛСЫН ИРЭЭДҮЙ ГЭРЭЛТЭЖ ЭХЭЛНЭ

Нүүрсний автозамын тээврийг Дорноговь аймгийн Засаг дарга О.Батжаргалаар дамжуулан хааж, олон мянган хүний амьдралаар тоглож байна хэмээн хараалгуулж байсан Зам, тээврийн хөгжлийн сайд Б.Дэлгэрсайхан одоо Монгол Улсын амьдралаар тоглож эхэлснийг эх сурвалжууд дэлгээд эхэлжээ. Учир нь тэрбээр БНХАУ-тай нүүрсний гэрээ хийхэд оролцохдоо 35 их наяд төгрөгийн алдагдалтай гэрээг үзэглэсэн гэдгийг хэлж байна.

Харин Б.Дэлгэрсайхан сайд болохоор “Би нүүрсний гэрээ хийгээгүй, зам холболтын гэрээ хийсэн, битгий хуцаад бай” гэсэн. Гэтэл Үндэсний аюулгүй байдлын зөвлөлийг тэргүүлж явсан Ерөнхийлөгч асан Н.Энхбаяр “Ц.Туваан, Б.Дэлгэрсайхан нарт гэрээ хийх эрх олгосон. Тавантолгойн нүүрсний 10 хувь нь коксжих нүүрс. 600 сая тонн коксжих нүүрсний 20 хувийг зөвхөн энэ гэрээгээр зарчихаж байна. Энэ үнэхээр оффтейк гэрээ юм бол мөнгөө шууд авах ёстой. Гэтэл аваагүй. Нийт 16 жил цувуулж авах нь. 250 сая нүүрс гаргалаа, баялгийн санд юу ч үлдэхгүй. Эндээс 10 тэрбум ам.доллар алдаж байна” хэмээсэн. Үүнээс улбаалан, Ц.Туваан ч яаран даран мэдэгдэл хийнэ лээ.

Б.Дэлгэрсайхан “Битгий хуц, би нүүрсний гэрээ хийгээгүй, зам холболтын гэрээ л хийсэн” гэж байгаа боловч төмөр зам холболтын гэрээ нь аанай л луйвар болсон гэдгийг дэлгэж эхэлсэн. Тэр өөрөө УИХ-ын чуулганы хуралдаан дээр хэлэхдээ “Төмөр зам холбоход 25 километрын зөрүү гарсан учраас 800 сая ам.доллар хэрэгтэй” гэж байсан. Энэ бол асар их мөнгө.

Нөгөө талаар төмөр зам холболтыг зөрүүлж байна гэдэг цаанаа бүлэглэлийн луйвар гэдгийг ч эх сурвалжууд нуухгүй. Түүнийгээ “Зам холболтод 800 сая ам.доллар хэрэгтэй” хэмээн чуулганы индэр дээрээс хэлж байгаа Б.Дэлгэрсайхан ч өөрөө энэ луйварт оролцсон гэсэн үг.

Тэгэхээр Засгийн газар дамжин сайдын суудалд залрахдаа удаа дараа алдагдалтай ажил явуулж байгаа Б.Дэлгэрсайханыг огцруулж яагаад болохгүй байгаа юм. Монголын төр ардчиллын жилүүдэд мөнгөтэй хүнээс айж ирсэн. Одоо бүр ч айдаг болоо юу. “Нүүрсний гэрээ” гэх зүйлээр Монгол Улсын бүтэн жилийн төсвөөр л тоглочихож байна. “Зам холболтын гэрээ” гэх зүйлээр гурван их наяд төгрөг салхинд хийсгэчихэж байхад яагаад чимээгүй байна вэ.

С.Өлзийт