Улсын дээд шүүхээс О.Цогтгэрэлийг АН-ын шинэ даргаар бүртгэлээ. Ардчилсан намынхан ийнхүү албан ёсоор даргатай болсноор УИХ дахь АН-ын даргын “зодоон” эхэлж байна. Учир нь УИХ дахь АН-ын бүлгийн дарга О.Цогтгэрэл намын дарга болсон тул УИХ дахь АН-ын бүлгийн дарга хэн болох вэ гэдэг хөндөгдөх нь аргагүй.

Энэ нь өнөөдөр ч эхэлчихсэн асуудал биш. АН-ын зарим гишүүд УИХ-ын намрын чуулганы хөшиг нээхтэй зэрэгцээд УИХ дахь 42 гишүүнээс санаачилга гаргаж, дараагийн даргын асуудлыг хэлэлцэх нь зүйтэй гэсэн байр суурьтай байсан бол зарим нь УДШ-д албан ёсоор бүртгүүлсний дараа энэ асуудлыг ярих ёстой хэмээн ярилцаж байв.

Тэгэхээр бүлгийн даргын сунгаанд юуны өмнө АН-ын дарга асан Л.Гантөмөр бичигдэж байна. Л.Гантөмөрийн хувьд "Намын даргаа өгнө" гэх амлалтадаа хүрсэн нь түүнийг хэр улстөрч болохыг харуулсан нь түүний болон АН-ын рейтингт эерэгээр нөлөөлсөн гэж хэлж болно. Энэ нь АН-ын дарга О.Цогтгэрэл өөрийн бүрэн эрхийн хүрээнд бүлгийн дараагийн даргаар Л.Гантөмөрийг нэрлэхгүй гэх газаргүй.

Одоогийн байдлаар АН-ын бүлгийн даргад горилож буй хүмүүсийн тоонд С.Эрдэнэболд, Ж.Баярмаа, Х.Тэмүүжин, Ж.Батсуурь, Б.Пүрэвдорж, Д.Ганбат нарыг нэрлэх болсон. Тэдэн дундаас Л.Гантөмөртэй өрсөлдөх хамгийн магадлалтай хүн бол Ж.Батсуурь. Гэхдээ 2024 оны сонгуулийн өмнө Ж.Батсуурийг тэвдэж явахад Л.Гантөмөр "аварсан" удаа бий. Д.Пүрэвдорж УИХ-ын дэд даргын суудлаа бүлгийн даргаар солих нь ашигтай байж мэднэ. Түүний хувьд ирэх Ерөнхийлөгчийн сонгуульд өрсөлдөхөөр сэм бэлдэж яваа. "Бидон" Д.Ганбатын хувьд бүлгийн даргаар ажиллаж байсан туршлагатай нэгэн.

Бүлгийн даргатай зэрэгцээд АН-ын генсек хэн болох вэ гэсэн асуулт тавигдах нь зүйн хэрэг. Нөгөө талаар Нийслэлийн АН-ын даргын сунгаа ч явж буй.

Нийслэлийн АН-ыг Ч.Лодойсамбууд өгөх яриа гарч, өдгөөгийн нийслэлийн АН-ын дарга Т.Батцогт орон нутгийн сонгуульд намаа навс ялагдуулсан, ажлаа өгөхөөс ч өөр аргагүй. Үүнийхээ хариуцлагыг ч хүлээх ёстой. Т.Батцогт бол экс Ерөнхийлөгч Х.Баттулгын ойрын хүн. Нөгөө талаар Ч.Лодойсамбууд нийслэлийн АН-ын даргыг өгөх нь олон нийтэд таалагдаж магадгүй л юм. Энэ мэтээр АН-д дарга нарын “зодоон” өрнөж эхэллээ.