Зуны сараас намрын дунд сар хүртэл түүчээлсэн Ах намын зодоон ирэх сарын 15-ны өдөр болох МАН-ын Их хурал өндөртөл үргэлжилж, цаашдаа ч үргэлжлэх төлөвтэй. Одоогийн байдлаар УИХ-ын гишүүн П.Сайнзориг УИХ-ын гишүүнийхээ албан бланк дээр Засгийн газрыг огцруулахаар УИХ-ын гишүүдийн гарын үсэг цуглуулж байгаа нь зодооны нэг өрнөл хэсэг хэдий ч үүний цаана ямар нэг хатгаас байгаа болов уу. Түүнээс бус П.Сайнзориг гэх гишүүн Ч.Лодойсамбуу шиг, С.Ганбаатар шиг албан бланкаа бариад гарын үсэг зуруулахаар гүйж хөнгөдөх хүн биш. Үүний цаана асар том хүч байна.

Магадгүй үүний цаад эзэн нь Ерөнхийлөгч У.Хүрэлсүх байж болох талтай. Өөрөөр түүнийг үгэндээ оруулах хүн үгүй л болов уу. Ерөнхийлөгч У.Хүрэлсүх Ерөнхий сайд Г.Занданшатарыг МАН-ын даргад сойж орхиод өрсөлдөгч Д.Амарбаясгаланд аргадаж нэг айлгаж нэг захиж орхиод АНУ-руу НҮБ-ын хуралд яваад ирэхэд Г.Занданшатар нь дахин дахин унаж, Д.Амарбаясгалан нь айсан ч үгүй, арганд нь орсон ч үгүй будилаантайхан Намын дарга болчихсон байхаар уур нь хүрээ биз.

МАН дотор хүч нь дэндүү суларч, “Шүдгүй арслан” болж байгаагаа мэдэрсэн учраас улам ч бухимдаж, тэр тэс өөр алхам хийхийг зорьсон болов уу. Тэгээд ч үүнээс үүдсэн зодоон Үндэсний аюулгүй байдалд ч нөлөөлөхүйц дэгдэж, нам бүү хэл түмэн олон талцаад эхэллээ. УИХ, Байнгын хорооны түвшинд хуралдаан бүрийг бойкот хийж, төрийн ажил ч гацаж эхэллээ. Хөндлөнгөөс АН ч татагдан орж байна гэхээр яах аргагүй үндэстэн хамарсан ажил болчихлоо. Тиймээс Ерөнхийлөгч Г.Занданшатарын Засгийн газрыг унагаах ажлыг зохион байгуулж, улмаар МАН-ын Их хурал хүртэл Д.Амарбаясгалангийн блокыг задалж, эгнээг нь эвдэх ажиллагааг өрнүүлж эхлэв үү гэмээр харагдана. Ерөнхийлөгч өрсөлдөж байгаа хоёрын аль нэг талыг илэрхий дэмжих, эсвэл аль нэг талыг илэрхий "намнах" ажиллагааг зохион байгуулж болохгүй. Тэр буруутан болж үлдэнэ. Улсын болъё гэхэд МАН-ын түүхэнд ингэж үлдэхгүйгээ мэдэх байх.

Тэгэхээр нь П.Сайнзоригоор Засгийн газрыг огцруулах гарын үсэг цуглуулуулж байгаад Г.Занданшатараа аваад хаячихна. Түмэн олонд бол өөрөөс нь хол л харагдана. Дэмжээд байхад явдаггүй нөхрөөр яахав гээд Түр үүрэг гүйцэтгэгчээр Тэргүүн Шадар сайд Н.Учралыг тавьчихна. Их хурал хүртэл бүлэглэлүүдийг хайрцаглаж байгаад Н.Учрал МАН-ын дарга болно. Н.Учрал бол яах аргагүй Ерөнхийлөгчийн нууц хөзөр мөн. Харин МАН-ын Их хурал хүртэл Д.Амарбаясгаланг "Бор тээг"-ээр нь бондойлгож байгаад хүчийг нь суларуулж, эгнээг нь эвдчихнэ. Улмаар УИХ-ын даргаас буулгаж, УИХ-ын даргаар Л.Энх-Амгалан орж ирэх магадлал байна. Аанай л энэ нь Ерөнхийлөгчөөс хол харагдана. Харин эргээд Г.Занданшатар, Д.Амарбаясгалан хоёртой зууралдах юм бол Ерөнхийлөгч өөрөө муухай харагдана гэдгээ ч мэдэж байгаа байх. Нэгэнт түүгээр хаяглачихсан тулаан нь ялагчгүй үлдсэн учраас гуравдагч этгээд заавал хэрэгтэй болно.

Нөгөө талаас АН-ын дарга О.Цогтгэрэл Ерөнхийлөгч У.Хүрэлсүхийг дэмжиж байгаа. Х.Тэмүүжин нарын хэсэг нөхөд нөгөө талд байна. Тэгэхээр Г.Занданшатарын Засгийн газар унах эсэх нь асуудал биш. Хамгийн багадаа МАН-ын 60 хувь, АН-ын 60 хувь гээд л уначихна. МАН-аас гарна хэмээн “Эм Си Эс” Д.Энхтүвшин тэргүүтэй нөхөд гүйлээд байгаа нь зүгээр ч нэг хэрэг биш. Энэ УИХ-д “Эм Си Эс”-ээс мөнгө аваагүй бүлэг фракц, гишүүд гэж тун цөөхөн. Ийм нөхцөлд Ерөнхийлөгч хувилбараа өөрчлөхгүй бол цааш явах аргагүй.

Н.Өлзийт