2025 оны 9-р сарын 26-ны орой Аса цирк аренад Монголын поп урлагийн сор болсон Камертон хамтлагийн тогтлолт зүгээр нэг тоглолт биш хөгжмийн хүчээр дамжсан сэтгэл зүрхний халуун яриа, мэдрэмжээр үе үеийн фенүүдээ нэгэн орон зайд нэгтгэсэн дурсамжийн аялал байв. Тэнд Камертон зөвхөн дуулаагүй, сэтгэл хөдөлгөсөн. “18 нас” дууны эхний нотоор Эба, Болд, Ганаа, Мээдээ тайзнаа гарч ирэх мөчөөс эхлэн фенүүд нь дуу бүрийг тэдэнтэй хамт дуулж, бүжиглэж гайхалтай оройг бүтээсэн төдийгүй Камертоны дуунууд хэзээ ч хуучрахгүй, үргэлж сэтгэлд амьд байдгийг мэдрүүлсэн юм.

Зохион байгуулалт, тайз, дуугаралт, амьд хөгжим гээд өөлөх зүйлгүй үдшийг мэргэжлийн түвшинд, нягт нямбай төлөвлөсөн төдийгүй фенүүдээ тоглолтын төв нь болгож байсан нь гайхамшигтай уур амьсгалыг бүрдүүлэх хамгийн чухал элемент болсон юм. “Өдөр тутмын завгүй амьдралын дунд ингэж зүрх сэтгэлээ амрааж, гүн амьсгал авах боломж ховор. Энэ орой яг тийм мэдрэмжийг өгч байна” хэмээн нэгэн фен ярьж байв.

Зарим хамтлаг дуу гаргадаг бол Камертон амьдрал хөглөдөг гэхэд хэн үгүй гэхэв. Өнөөдөр Камертон бас нэгэн гайхамшигт оройг фенүүддээ бэлэглэнэ. Өчигдрөө дүгнээд хэлэхэд, тоглолт эхлэхэд хүмүүс баярлаж байв. Дундуур нь уярч байв. Төгсөх дөхөхөд “Бүү дуусаасай” гэж дотроо шивнэж байв. Камертоны тоглолт яг л дурласан мэдрэмж шиг — эхлээд догдолж, дараа нь уусч, төгсгөлдөө улам л татагдсаар...

songolt.mn