Багш нарын цалин нэмэх асуудлаар гурван яамны хамтарсан ажлын хэсэг ажиллаж эхэлжээ. Боловсролын сайдын тушаалаар байгуулагдсан Ажлын хэсэг нь багшийн нэмэлт чиг үүрэг, ачаалалтай уялдуулан цалин хөлсний бүтцэд шинжилгээ хийх, багшийн цалинг нэмэгдүүлэх санал боловсруулах зорилготой аж. Ажлын хэсгийг Боловсролын сайдын зөвлөх Д.Гантулга ахалж байгаа бөгөөд ажлын хэсэгт Сангийн яам, Гэр бүл, хөдөлмөр, нийгмийн хамгааллын яам, Монголын Боловсрол, шинжлэх ухааны Үйлдвэрчний эвлэлийн холбооны төлөөлөл багтсан байна. Ажлын хэсэг санал, дүгнэлтээ 2025 оны наймдугаар сарын 30-наас өмнө танилцуулахаар төлөвлөжээ.

Бодит байдлаас харахад төсвийг голчлон бүрдүүлж байгаа нүүрсний экспорт татарч, үнэ буурсан. Энэ оны эцэс гэхэд цалин тавьж чадах уу үгүй юу даа тулчихсан Засгийн газар хаанаас ямар мөнгө гаргаж, багш нарын цалинг нэмэх гээд байгаа юм бол.

Тэгэхээр багш нар хичээлийн шинэ жилийг угтан, цалин нэмэхгүй бол ажил хаяж, суулт зарлана гэдгээ мэдэгдсэн учраас ийнхүү арга хэмжээ авч байгаа байх. Төсөв байхгүй ч аргалж, ямартай ч хичээлийн шинэ жилээ эхлүүлэх арга болов уу. Ажил хаяна, суулт хийнэ гэж байгаагийн цаана эгэл жирийн багш нар байхгүй, багш нарын нэр барьсан хэдхэн тооны нөхөд л бий.

Songolt.mn