Улаанбаатар хот 2040 оны хөгжлийн ерөнхий төлөвлөгөөний дагуу нийслэлийн төвлөрлийг сааруулах, бүс нутгийн тэнцвэртэй хөгжлийг хангах зорилгоор Төв аймгийн Сэргэлэн сумын 31 га талбайд Хүннү хотыг байгуулахаар төлөвлөсөн. Хотын дэд бүтцийн угсралтын ажил үргэлжилж байна. Тухайлбал, цахилгаан хангамжийн ажил 86 хувь, ус хангамжийн ажил 80 хувь, үерийн хамгаалалтын сувгийн ажил 75 хувь, мэдээлэл холбооны сүлжээний ажил 75 хувь, ариутгах татуургын ажил 10, дулаан хангамжийн ажил 10 хувийн гүйцэтгэлтэй үргэлжилж байна.

Хүннү хотод 150 мянган хүн оршин суух бөгөөд 80 мянган ажлын байр шинээр бий болно гэсэн тооцоолол гарсан байдаг.

Төв аймгийн Сэргэлэн сумын 31 мянган га талбайг хамрах тус хэсэгт их, дээд сургууль, оюутны хотхон, тэр захиргааны болон логистикийн нэгдсэн цогцолбор байгуулж, эдийн засгийн чөлөөт бүс байхаар төлөвлөж байгаа аж. Түүнчлэн нийслэлийн алслагдсан гурван дүүргийн нэг болох Багахангайгаас Хүннү хот салбар төмөр замын ажил үргэлжилж буй. Уг төмөр зам нийт 102 км үргэлжилнэ гэж холбогдох албанаас мэдээлж байсан. Мөн гал тэрэгний хурдыг 90 км/цаг байхаар тооцоолсон байдаг. Шинэ Зуунмод хотын эрх зүйн байдлын тухай хуульд өөрчлөлт оруулж тухай хуулийн төсөл болон дагалдах хууль тогтоомжийн төслөөр нийслэлийн тусгай чиг үүргийг хэрэгжүүлэх “Шинэ Зуунмод” хот нэрийг “Хүннү хот” болгон өөрчилсөн байдаг.

“Хүннү хот” нь төрт ёс, соёл, уламжлалыг орчин үеийн хөгжлийн чиг хандлагатай хослуулан, байгальд ээлтэй, “ухаалаг” хот болох ба дулааны ачаалал 460 гкал/цаг, цахилгааны ачаалал 325 мВт байхаар хотын ерөнхий төлөвлөгөө төлөвлөгдөж 2025-2027 онуудад үе шаттайгаар ашиглалтад оруулах юм. Цахилгааны эрчим хүчний ачааллыг 150 мВт батарей хуримтлуур бүхий 200 мВт нарны болон 100 мВт салхины, нийт 300 мВт-ын хосолмол сэргээгдэх эрчим хүчний эх үүсгүүрээс төр, хувийн хэвшлийн түншлэлийн хүрээнд хангахаар төлөвлөж байна.

Ирэх онд энэ хотын авто замуудыг барьж дуусгахаар болжээ. Эхлээд инженерийн дэд бүтцээ бүрэн шийдсэний дараа тус хотод газар олгоно. Гэхдээ тээвэр логистикийн чиглэлд ажиллах ААН-д газар түрүүлж олгоно. Учир нь тээвэр-логистикийн төв ирэх аравдугаар сард ашиглалтад орно. Хүннү хотод иргэдийн худалдан авах чадварт тохирсон орон сууц барихад анхаарна. Төрийн албан хаагчид энд олноороо ирж ажиллана. Төр-хувийн хэвшлийн түншлэлээр хотхон хэлбэрээр хэрэгжүүлнэ. Ипотекийн зээл авсан иргэн дахин энэ зээлийг авах боломжгүй байдаг. Харин Хүннү хотод орон сууц авах бол энэ журам үйлчлэхгүй гэж Хүннү хотын захирагч М.Батбаяр онцолж байв.

Нийслэл Улаанбаатар хотын хүн амын хэт төвлөрөл, хүрээлэн байгаа орчинд үзүүлж буй сөрөг нөлөөг бууруулах, олон улсын нисэх онгоцны буудлыг түшиглэн эдийн засгийн тодорхой салбаруудыг хөгжлийн бодлогод нийцүүлэн хөгжүүлэх, хүн амыг эрүүл, аюулгүй орчинд ажиллаж, амьдрах таатай нөхцөлийг бүрдүүлэх, үйлдвэрлэл, тээвэр логистик, аялал жуулчлалыг дэмжих зорилгоор Монгол Улсын Их Хурлын 2024 оны 76 дугаар Тогтоолоор Төв аймгийн Сэргэлэн, Алтанбулаг сумын нутаг дэвсгэрт нийслэлийн дагуул хот "Хүннү" хотыг байгуулахаар шийдвэрлэсэн юм.