-ЗАДАРСАН ЗАСАГ НОЁН О.БАТЖАРГАЛЫГ “ЗАСАХ” ЦАГ НЬ БОЛЖЭЭ-

Улс орны эдийн засаг сайнгүй, төсөв 2.5 их наядаар тасарчихсан, бүсээ чангалах, хэмнэх тухай ярьж байна. Цаг үеийн ийм хүнд нөхцөлд Дорноговь аймгийн Засаг дарга О.Батжаргал нүүрсний уртын тээврийг зогсоох шийдвэр гаргаж, мөн Замын-Үүд Ханги Мандалын боомтоор гарч байгаа жонш тэргүүтэй уул уурхайн бүтээгдхүүний экспортыг зогсоон, нийгэм, эдийн засагт чамгүй хохирол учруулсныг “Нэгүүн.мн” сайтынхан газар дээр нь очиж мэдээллээ.

Зөвхөн Дорноговь аймгийн Ханги Мандалын боомтоор өдөрт 2600 машин хилээр орж гардаг. Тодотговол, өдөрт 22800 орчим тонн нүүрс хятад руу гаргаж, 1.3 сая ам.доллар буюу монгол төгрөгөөр 4.5 тэрбум орчим төгрөг олдог аж. Гэтэл аймгийн Засаг дарга О.Батжаргал шийдвэр гарган, өнгөрөгч тавдугаар сарын 30-ны өдөр нүүрс тээврийн уртын замыг хааснаар сүүлийн хоёр сарын хугацаанд Монгол Улс 100 гаруй сая ам.доллар алдчихсан гэсэн үг. Нүүрс тээврийн жолооч нарын ар тал, гэр бүл гэхээр дундажаар 10 мянга орчим хүний амьдралыг зогсоосон. Мөнхүү нүүрс тээвэр дагасан, цайны газар, дугуй засвар, зочид буудал гэх мэт бүхий л бичил бизнес зогссон гэхээр Засаг ноён О.Батжаргал олон арван мянган хүний хоолыг булаачихаж. Нөгөө талаар нүүрсний тээвэр хийж байгаа жолооч нарын ихэнх нь лизинг буюу зээлээр машинаа авчихсан, өдгөө зээлээ ч төлж чадахгүй сууна.

Уг нь Монгол Улсын Засгийн газар нүүрсний экспортыг бүхий л боломжоороо дэмжин, бодлого гаргаад үүнийхээ дагуу явж байгаа. Өнөөдөр төсвийг бүрдүүлж, биднийг тэжээж байгаа гол хүчин зүйл бол нүүрс. Гэтэл нэг аймгийн Засаг дарга нь нүүрс тээврийг хориглон, том толгой гаргаж, Монгол Улсын Засгийн газрын бодлогыг сөрж байгаагийн цаана ямар санаа байна вэ.

Мэдээж үүний цаана Зам, тээврийн хөгжлийн сайд Б.Дэлгэрсайхан сайдыг бий гэх эх сурвалжийн мэдээлэл бий. Засаг ноён О.Батжаргал бол Б.Дэлгэрсайханы “тавиул” гэдгийг бүгдээрээ мэднэ.Тиймдээ ч Зам, тээврийн хөгжлийн сайдын Төмөр замын тээврийг дэмжих нэрээр авто тээврийг зогсоох шийдвэрийг шахалтаар гаргасан байх магадлалтай. Улс орон, ард түмнийхээ эрх ашгийн төлөө бус эзэндээ үйлчилдэг засаг ноёныг засах цаг нь ч болсон.

Засгийн газраас “Экспортыг нэмэгдүүлж, худалдааг дэмжих” ажлын хэсэг байгуулан, Эдийн засгийн хөгжлийн сайд Н.Учралаар ахлуулан ажиллаж, шуурхай арга хэмжээ авч байна. Үүний гол зорилго нь нүүрс тээврийг дэмжих экспортыг нэмэгдүүлэх юм.

Ийнхүү Засгийн газрын бодлого байхад нэг аймгийн Засаг дарга эзнийхээ захиалгаар том толгой гарган, төсөв шатааж байгааг юу гэх вэ. Учир нь нэгэнт олборлоод гаргасан олон мянган тонн нүүрс, удаан хугацаанд хадгалах боломжгүй учраас шатаж байна. Энэ нь улсын төсөв шатаж байна гэсэн үг. Ийн дураар авирлаж байгаа аймгийнхаа Засаг даргад Засгийн газар арга хэмжээ авч, үүсээд байгаа нөхцөл байдал анхаарах хэрэгтэй болжээ.

С.Баяр