Дэлхийн аваргын мөнгө хүрэл медальт Пара жүдогийн үндэсний шигшээ багийн тамирчин Лхайжавын Туруунаатай ярилцлаа.

-Анх хэрхэн спортын гараагаа эхлүүлж байв. Эндээс яриагаа эхлүүлье?

-Анх 2011 онд Улаанбаатар хотод ирж сургалтад сууж байхдаа Бүх ард түмний спартакиадад оролцож мөнгөн медаль хүртэн, спортын гараагаа амжилттай эхлүүлж байлаа. Үүнээс хойш 2014 онд анх удаа олон улсын тэмцээн болох Инчоны Азийн наадамд явсан, 2018 он хүртэл явж байгаад түр зуур завсарлаад 2022 оны Дэлхийн аварга шалгаруулах тэмцээнд явж мөнгөн медаль хүртсэн. Үүнээс хойш дэлхийн хэмжээний найман тэмцээнд оролцож, бүгдээс нь медаль хүртсэн. Азийн аваргын алт, хүрэл, Токиогийн их дуулгаас алтан медаль, Гран при наадмын дөрвөн ч хүрэл медаль бий. Эндээс оноогоо цуглуулж, олимпын эрхээ авснаар 2024 оны Парисын олимпод оролцож, тавдугаар байранд орсон. Хамгийн сүүлд Казакстанд болсон Дэлхийн аварга шалгаруулах тэмцээнээс хүртэл медаль авсан.

-Таны удамд барилддаг хүмүүс байна уу?

-Би Увс аймгийн Тэс сумын хүн. Тэс суманд барилддаггүй эрэгтэй хүн гэж бараг байхгүй. Тэгэхээр аль ч талаараа удам байж таарна. Тэр сайхан нутагт төрж өссөн учраас барилдаж байгаа хэрэг.

-Одоо ямар тэмцээнд оролцохоор бэлдэж байна. Зардал мөнгөө хэрхэн зохицуулж байна вэ?

-Ирэх наймдугаар сарын дундуур Египетын Их дуулгад явахаар бэлдэж байна. Есдүгээр сард Азийн аварга шалгаруулах тэмцээнд бас явна. Улсын шигшээ багт байдаг болохоор зардал тэндээс гардаг. Их дуулгаас хүрэл медаль авсан учраас түрүүлэх зорилготой бэлтгэлээ базааж байна. Дэлхийн шилдгүүд очдог учраас сайн л бэлтгэлтэй байх хэрэгтэй.

-Дэлхийн аваргын мөнгө хүрэл, Азийн аваргын алт хүрэл гээд өндөр амжилт үзүүлсэн тамирчин байтал Гавьяат тамирчин цол ч хүртээгүй юм байна. Энэ талаар ямар бодолтой явна?

-Төр засгаас ямар нэг гавьяа шагнал өгөөгүй, сум орон нутгаас ч үнэлээгүй. Пара ч гэсэн адилхан л хөлс хүч гаргаж, хөдөлмөрлөдөг. Гэтэл үнэлдэггүй. Бусад шиг байр, машин өгчихгүй ч хүлээж авч уулзах хэрэгтэй биз дээ. Пара гэхээр хоёр, гуравдугаарт тавьдаг нь шударга бус санагддаг. Нутгийн зөвлөл, манай нутгаас, сумаас УИХ-д сонгогдсон О.Цогтгэрэл гишүүн ч анхаарч хүлээж авсангүй.

-Ямар багш дээр бэлтгэл сургуулилтаа хийж байна?

-Уг нь Цагаанбаатар академи дээр бэлтгэл сургуулиа хийдэг байсан. Он гараад Спортын төв ордон дээр бэлтгэлээ базааж байна. Пара жүдогийн үндэсний шигшээ баг гэж байдаг, энд л анхнаасаа явсан.

С.Ууганбаяр