“Үндэсний давхар даатгал” ХК, “Ард” санхүүгийн нэгдэл банк бус санхүүгийн байгууллагатай хамтран малчдад нэгэн шинэ зээлийн шугам нээж өгч байгаагаа дуулгасан юм. Тодотговол, малын индексжүүлсэн даатгалд хамрагдсан малчин бүр гурав хүртэлх сая төгрөгийн зээлийг гар утаснаасаа авч болох боломжийг нээж өгчээ. Энэхүү хамтын ажиллагааны гэрээнд “Үндэсний давхар даатгал” ХК-ийн Гүйцэтгэх захирал Б.Жавхлант, “Ард” санхүүгийн нэгдэл банк бус санхүүгийн байгууллагын Гүйцэтгэх захирал Г.Сүхбаатар нар гарын үсэг зурж баталгаажуулснаар уг ажил гараанаас гарлаа.

Өнөөдөр хөдөө орон нутагт ажиллаж амьдарч байгаа малчдад Төрийн болон Хаан банкнаас өөр санхүүгийн үйлчилгээ авах байгууллага байдаггүй. Мөн зээл авах гэхээр байнгын цалин орлогогүй, нийгмийн даатгал төлдөггүй учраас боломжгүй. Тиймээс зөвхөн Хаан банкинд малаа барьцаалсан “Малчны зээл”-ээс өөр сонголтгүй малчдад санхүүгийн шинэ үйлчилгээ нээж өгч байгаад хаа хаанаа талархалтай байна. Харин “Үндэсний давхар даатгал” ХК-иас санаачлан хэрэгжүүлэхээр зэхсэн энэхүү зээлийн үйлчилгээ бол малын индексжүүлсэн даатгалд хамрагдсан тохиолдолд малчин бүр гар утсандаа апплейкшн татаж авснаар гурван сая төгрөг хүртэлх зээлийг малынхаа бэлчээр дээрээс авах боломжтой. Уг зээлээ хүүг нь төлөөд цааш сунгаад хэрэглэж болох зээлийн чухал сувгийг нээж өгч байгаагаараа тун онцлог.

Энэ үеэр “Үндэсний давхар даатгал” ХК-ийн Гүйцэтгэх захирал Б.Жавхлант “Бид “Ард” санхүүгийн нэгдэл Банк бус санхүүгийн байгууллагатай хамтран даатгалд хамрагдсан малчид гурван сая хүртэл төгрөгийн бичил зээл авах санхүүгийн шинэ үйлчилгээг хүргэж эхэлсэн. Зээлийн хэмжээ гурван сая хүртэл байна. Малчин хүнд гэнэт мөнгөний хэрэгцээ гарахад эрж сураад явахгүй, гар утаснаасаа энэхүү бичил зээлийг авч болох боломжийг нээж өгч байгаа юм. Хөдөө орон нутагт, тэр тусмаа малчдад санхүүгийн үйлчилгээ хязгаарлагдмал байдаг учраас мөнгөний хэрэгцээ гарч тулгамдах үе бий. Тиймээс малчид маань даатгалдаа хамрагдсанаар энэхүү бичил зээлийг авч, цааш нь сунгаад хэрэглэх боломжтой боллоо. Нөгөө талаар малчид малын индексжүүлсэн даатгалд төдийлөн идэвхтэй хамрагдаж, мал, эд хөрөнгөө эрсдлээс хамгаалахгүй байгаа учраас үүнд нь ч хөшүүрэг болж, тэдний мал, эд хөрөнгийг хамгаалах гэсэн бидний нэг шинэ ажил гэж болно” гэлээ. .

Дашрамд дурдахад “Үндэсний давхар даатгал” ХК нь даатгалын бүтээгдэхүүний борлуулалтынхаа хугацааг долоодугаар сарын 1-ний өдөр хүртэл зохион байгуулдаг байсан бол энэ жил санхүү, зээлийн шинэ үйлчилгээ нэвтрүүлж байгаатай холбогдуулан, хоёр сараар сунгаж, зээлийн үйлчилгээг таван аймагт туршиж эхэлсэн байна. Тэгэхээр малчид маань даатгалын бүтээгдэхүүний борлуулалтын хугацааг сунгасан хоёр сард амжиж малаа даатгуулаад гэрийнхээ хоймор, хороо хотноосоо, малынхаа бэлчээрээс гээд хаанаас ч болтугай хэрэглээний бичил зээлээ авах боломжийг алдахгүй биз ээ.

Songolt.mn