Ерөнхий сайдын бэрийн цүнхний асуудал Засгийн газрыг ганхуулж, улмаар МАН-ын Бага хурлын асуудал болсон бол одоо Төрийн эрх барих дээд байгууллагын индэр хүртэл хүчээ авлаа. Энэ асуудлыг “Эм Си Эс”, Ухаа худаг мэтэд нааж байгаа ч үнэн хэрэгтээ Ерөнхийлөгчийн сонгууль угтсан ажиллагаа гэдгийг энд нурших нь илүүц хэрэг биз. “Эм Си Эс”-ийн дэмжлэг мэдээж байж таарна. Товчхондоо Л.Оюун-Эрдэнэ айсуй сонгуулийн нэг том өрсөлдөгч болох “Женко” фракцтай бөөрөө нийлүүлэх болсон явдал нь Ерөнхийлөгчийн айдас болж, эцэстээ Засгийн газар огцрох үндэслэл болов.

Одоо УИХ-аар Ерөнхий сайдад итгэл үзүүлэх эсэх тухай асуудал яригдах төсөлтэй дөрөө харшуулан, АН-ын найман сайд өргөдлөө өгч засгаас гарахаа мэдэгдсэн. АН-ын дарга Л.Гантөмөр ч “Ерөнхий сайдад итгэл үзүүлэх эсэх асуудал өөр хэрэг. Харин АН-ын сайд нар засагт байхгүй гэдгийг ойлго” хэмээн байр сууриа илэрхийлсэн. Тэгэхээр УИХ-д 42 суудалтай АН засгаас гарчихаад Л.Оюун-Эрдэнэд итгэл үзүүлэх үү. МАН-ын Бага хуралдаанаар АН-ыг засгаас гарга гэсэн шийдвэр гаргасан 68 суудалтай эрх баригч намын гишүүд 100 биш юмаа гэхэд 70 хувийн итгэл үзүүлэх үү гэдэг асуудал зүй ёсоор хариултгүй үлдэж байна. АН-ыг Засгийн газраас гарга гэсэн Бага хурлын шийдвэрийг үндэслэгч буюу хоёрдугаар ээлжийнхэн хоолондоо орох гэж яарч байгаа энэ цагт Л.Оюун-Эрдэнэд итгэл үзүүлэх эсэх нь ихээхэн эргэлзээ төрүүлнэ.

Ерөнхий сайдад итгэл үзүүлэх эсэх нь кнопны асуудал. Үлдлээ гэхэд амь тариа төдий зүйл болно. Эрчимт эмчилгээний тасагтаа байсаар удахгүй дуусна гэсэн үг. Хэрвээ Л.Оюун-Эрдэнэ өөрөө өргөдлөө өгөх юм уу, эсвэл УИХ түүнд итгэл үзүүлэхгүй бол хэн Ерөнхий сайд болох вэ гэдэг асуудал тулгарна. Энд тэндгүй олон таамаг явна. Юуны өмнө шинэ Ерөнхий сайд Ерөнхийлөгчийн шүхэр дороос төрөх нь ойлгомжтой. У.Хүрэлсүх шууд бус утгаар Засгийн газраа байгуулж, хэмжээлшгүй их хаанд тэмүүлж байгааг бүгд л мэдээлж байна. Нуух зүйл ч алга болж. Тэгэхээр Ерөнхийлөгчийн Тамгын газрын дарга Я.Содбаатар, Шадар сайд С.Амарсайхан гэх мэт Ерөнхийлөгчийн шүхэр дор аж төрдөг нөхдийг Ерөнхий сайдад нэрлээд байсан ч тэд хоёулаа “Ерөнхий сайд болохгүй” гэх хатуу байр суурь илэрхийлсэн.

Тэгэхээр одоо У.Хүрэлсүхийн шүхэр дор УИХ-ын гишүүн, Засгийн газрын хэрэг эрхлэх газрын дарга Н.Учрал тунаж үлдсэн. Н.Учралын хувьд Ерөнхийлөгчид хамгийн амар Ерөнхий сайд байх ч насны хувьд залуу, зангараг дутаж болох ч Тоглоомын Ерөнхий сайдад нас, зангараг юуны хамаа байна. Нэгэнт л нэгдүгээр хүн Засгийн газраа байгуулж байгаа учраас тэнд тоглоомын 40 наст байна уу, санаа суусан 60 наст байна уу, хамаагүй. Гагцхүү далд эзэндээ үйлчлэх л үүрэгтэй. Тэгээд ч Н.Учрал сайд У.Хүрэлсүхийгээ төрсөн эцгээсээ илүүд шахам үздэг хүн.

Тиймээс одоо сайд болох гээд чуулганы танхим орхин гүйлдээд байгаа хоёрдугаар ээлжинхэн хэн нэгнийг таамаглах бус Н.Учралын засагт тавтай морилохоо бод. Өөрөөр хэлбэл Н.Учрал дүүдээ эртхэн шиг хадаг сүүгээ бариад оч гэсэн үг. Хэрэв Н.Учрал тоглоомын Ерөнхий сайд болбол улиран үлдэх сайдууд гэвэл “Баян хүн гурван төлд нүүртэй” гэдэг утгаараа С.Амарсайхан, эртнээсээ л Ерөнхийлөгчийн өмнөөс Л.Оюун-Эрдэнэ рүү дайраад байна уу гэмээр анзаарагдах болсон Б.Энхбаяр энэхүү харамжидаа Хууль зүй, дотоод хэргийн сайдад очих болов уу. Эрүүл мэндийн сайд Т.Мөнхсайхан айж байгаа ч үлдэх магадлалтай. Бараг айх хэрэггүй биз. Үүний дараа АН-ыг засгаас гаргах замаар Л.Оюун-Эрдэнийг зайлуулах санаачилга гаргасан хоёрдугаар ээлжийн хэдэн нөхөд орж ирэх нь дамжиггүй. Гэхдээ юм юм л болно.

Соёл урлагийн салбарыг дампууруулсан Ч.Номин У.Хүрэлсүхийн суганд аль эрт ороод хярчихсан байгаа. Суудлын төлөө хэнтэй ч наймаа хийж явдаг С.Бямбацогт, хөрөнгөөрөө засгийг парламенттай нь хамт зодчих Б.Дэлгэрсайхан гэх мэт нөхөд суудлаа хамгаалах гэж үзнэ. Хамгаалаад үлдчих магадлал ч өндөр байна.

С.Ууганбаяр