Н.Алтанхуягийн Засгийн газрыг хэрхэн хэн, яаж унагааж байсныг санаж байгаа байх. Тухайн үед Засгийн газрыг унагаах ажлыг Ерөнхийлөгч Ц.Элбэгдорж зохион байгуулж, схемыг нь зурсан гэдгийг Н.Алтанхуяг өөрөө ч хэлдэг, бусад нь ч хэлдэг. Тухайн үед хоёр удаа Ерөнхийлөгчийн суудалд залраад олон хууль бус зүйлд гар дүрсэн Ц.Элбэгдорж өөрийг нь оролдохгүй байх, хууль бус зүйлийг сөхөж тамлаад байхгүй, өөрийнхөө хамтрагчдаас Ерөнхийлөгчийн сонгуульд нэр дэвшүүлэх үүднээс л Н.Алтанхуягийн Засгийн газар огцорч байсан. Түүнээс бус тухайн Засгийн газар тийм ч огцрохдоо тулчихсан бүтэц байгаагүй. Өөрийнхөө хэмжээнд чамгүй л ажиллаж байсан. Ингэхдээ С.Баярцогт, Р.Амаржаргал, Д.Бат-Эрдэнэ гэх мэт олон кадрууд Ерөнхий сайд болох боломжтой байсан ч Ч.Сайханбилэгийг гаргаж ирээд тоглоомын Ерөнхий сайд болгосон. Өнөөдөр тэр эх орондоо ирэх эрхгүй тэнүүчилж явна. Ч.Сайханбилэгийг Гүйцэтгэх засаглалын тэргүүн болох үед улс орны эдийн засаг ерөнхийдөө уруудаж, шалан дээр уначихсан байсан учраас Дубайн гэрээ гэх зүйлийг УИХ, Засгийн газартаа ч мэдэгдэлгүй хийчихсэн. Өөр арга ч байгаагүй. Улс орны мөнгөний авдар хоосон учраас ямар нэг зүйл хийх хэрэгтэй болсон учраас Оюутолгойн далд уурхайн бүтээн байгуулалтын гэрээг ч хийсэн, өөрөө ч авдгаа авсан байх. Энгийнээр хэлэхэд өрх айлд тохиолдох л нэг зүйл. Хямралыг давах гэсэн өрхийн тэргүүний арга хэмжээ байсан.

Өнөөдөр энэ зүйл яг давтагдах гэж байна. Өөрөөр хэлбэл Л.Оюун-Эрдэнийн Засгийн газрыг унагаах ажиллагааг хөшигний ар талд Ерөнхийлөгч У.Хүрэлсүх удирдаж байна. Түүнээс бус хэдэн сая төгрөгийн үнэтэй цүнхэндээ ч биш. Л.Оюун-Эрдэнийн тэргүүлсэн Засгийн газар овойж оцойх зүйл үгүй ч хэмжээндээ л чардайн ажиллаж байгаа.

МАН-ын Бага хурлаар гарсан шийдвэр ч тэр. Л.Оюун-Эрдэнийг АН-аас сал л гэсэн. Цаад талдаа Х.Баттулгаас сал гэсэн санаа. МАН-ын даргын алдаа нь Ерөнхийлөгчийн сонгууль мөрөөдөж байгаа У.Хүрэлсүх болон бусад нөхөрт гуравдагч этгээд болох Х.Баттулгатай бөөрөө нийлүүлж байгаа нь огтхон ч таалагдахгүй байна. Түүнээс Бага хурлаас Л.Оюун-Эрдэнийг огцор гэсэн шийдвэр гаргасангүй. Улс төрийн талаасаа ингэж болохгүй. Тэртээ тэргүй хамтарсан Засгийн газраас АН гарчихвал Л.Оюун-Эрдэнэ огцрохоос өөр аргагүй гэсэн санааны үүднээс ийм сонголтыг тулгасан хэрэг. Гэхдээ МАН-ын Бага хурлын шийдвэр бол төрийн шийдвэр биш. Хэрэв Л.Оюун-Эрдэнэ Ерөнхийлөгчийн схемээр явна гэвэл УИХ-д кнопоор үлдэх гэж үзэх үү, эсвэл үг дуугүй унах уу гэдэг асуудал бий. Ямартай ч өнөөдрийг хүртэл өөрөө огцрох өргөдлөө өгөөгүйг бодоход кнопоор үлдэх оролдлого ч төлөвлөсөн байж болох юм.

Үүнээс харахад У.Хүрэлсүх Үндсэн хуульд гар хүрч, ахин Ерөнхийлөгчөөр сонгогдох арга зам хайж байж болох юм. Эсвэл Ц.Элбэгдорж шиг араас нь ухаж төнхөөд байхгүй нэг нөхрийг Ерөнхийлөгчийн сонгуульд явуулах таатай нөхцөл бүрдүүлэхээр улайрч байгаа хэрэг. Түүнээс тэр АН гэрээ зөрчсөн гэх бол зүгээр л шалтгаан. Хэрвээ Л.Оюун-Эрдэнэ унахдаа тулвал түүний оронд тоглоомын Ерөнхий сайд тодорно. Улс орны эдийн засаг Н.Алтанхуягийн Засгийн газрын үеийнхээс дээрдэх зүйл алга. Дор ч байж мэднэ. Ямартай ч ирэх намар улсын төсөв тасалдана. Түүхэндээ байхгүй ийм үйлийн өмнө шинэ Ерөнхий сайд ямар нэгэн арга хэмжээ авч таарна. Хүчтэй сөрөг хүчинтэй Ерөнхий сайд ёстой л УИХ, Засгийн газраасаа нуусан үйлдэл, гэрээ хэлцэлд ч орж таарна. Ингэхээс өөр аргагүй байдал үүнийг тосон уулзана. Харин эцэст нь Л.Оюун-Эрдэнэ бус гэрээ хэлцэл хийсэн Ерөнхий сайдад Ч.Сайханбилэгийн араас зугтаах уу, энд шоронд хатах уу гэх хоёр сонголт л үлдэнэ. У.Хүрэлсүхийн хувьд ийм л схем зурсан нь илтэд харагдах боллоо.

С.Ууганбаяр