Өнөөдрийн парламентад олон шинэ төлөөлөл орж ирсний нэг нь Даваагийн Цогтбаатар. Харамсалтай нь тэр 2016-2020 онд Хөгжлийн банкны хэлтсийн захирлаар ажиллаж байхдаа албан тушаалаа урвуулан ашиглаж, “Мон дулаан”, “Газ импорт”, “Бэрэн” компанид давуу байдал олгосон хэргээр шалгагдан, 2023 оны долоодугаар сард Сүхбаатар дүүргийн Эрүүгийн хэргийн анхан шатны шүүхээс нийтийн албанд томилогдох эрхийг нь хоёр жил хасаж, 20 сая төгрөгөөр торгох ял оноосон байдаг. Улмаар анхан шатны шүүхийн шийдвэрийг 2024 оны арванхоёрдугаар сарын 11-нд Улсын дээд шүүхээс хэвээр үлдээсэн.

Өөрөөр хэлбэл манай парламентад ял авсан гишүүн хууль зөрчин ажиллаж байна гэсэн үг. Гэтэл Хууль зүй, дотоод хэргийн сайд болон УИХ-ын гишүүд “Цогтбаатар гишүүнийг эргүүлэн татах эсэх асуудал хулуийн мухардалд орсон” гэлцэж байна. Ийм завхарсан эрхзүйт төр гэж юу байхав. Үнэхээр хуулийн мухардалд орсон бол Үндсэн хуулимйн цэц авч хэлэлцэх ёстой биз дээ. Гэтэл дээрээ хөхрөгч тэнгэрээс өөр юу ч байхгүй гэгдэх Үндсэн хуулийн цэц ажлаа хийхгүй байгаа нь гайхалтай. Д.Цогтбаатар гэдэг нөхөр Үндсэн хуулийн цэцэд хүртэл нөлөөлөх тийм өндөр эрх мэдэлтэй юм уу, эсвэл Үндсэн хуулийн цэц нь анхаарахгүй байна уу гэх асуудал зүй ёсоор урган гарна.

Монгол Улсын шинэ Үндсэн хууль батлагдсанаас хойших 33 жилийн түүхэнд анх удаа Үндсэн хуулийн цэцэд хандан тодорхой хууль, Үндсэн хууль зөрчсөн эсэх асуудлаар хүсэлт гаргах гэж байгаа аж. Энэ утгаараа анхны жишиг тохиолдол болно. УИХ хүсэлт гаргахад Үндсэн хуулийн цэц маргаан үүсгэх үү, үгүй юу гэдэг асуудлыг хэлэлцдэггүй, шууд үүсгэдэг. Шууд Цэц бүрэн бүрэлдэхүүнээрээ хуралдаж энэ асуудлыг шийдвэрлэдэг онцгой горимтой

Ерөөсөө хуульд мухардал гэж байдаггүй. Хууль мухардсан бол Үндсэн хуулийн цэц арилгах чиг үүрэгтэй. Үндсэн хуулийн цэцэд хүсэлтээ гаргаж асуудлыг шийдвэрлүүлэх ёстой. Улсын дээд шүүх эцсийнх байна гэж Үндсэн хуультай мөртлөө УИХ нь ард иргэдээсээ хууль биелүүл гэж шаардах улс төр, эрх зүй, ёс суртахууны эрхгүй болж байна. Тэгэхээр УИХ ч ажлаа хий, Үндсэн хуулийн цэц ч ажлаа хий. Гэмт хэрэг өдүүлсэн Д.Цогтбаатар гэх УИХ-ын гишүүн ард түмний төлөөлөл гээд хууль зөрчин ажиллаад байна шүү дээ. Энэ талаар бид Д.Цогтбаатарыг гэмт хэрэг өдүүлж байх үеийн үйл явцыг ч тодорхой эх сурвалжтайгаар үргэлжлүүлэн дэлгэсээр байх болно.

Үргэлжлэл бий ...

Songolt.mn