Ерөнхий сайд Л.Оюун-Эрдэнэ унавал “цовдлуулна”. “Цовдлуулснаас” өөрцгүй хувь тавилан түүнийг тосон уулзана. Энэ бол аймшиг. МАН болон улс төрийн хүрээнд УИХ-ын гишүүний бүрэн эрхийнх нь хугацаа дуусахаас нь өмнө ч “цовдолж” мэдэхээр харагдаж байна. Өөрөөр хэлбэл тэд Л.Оюун-Эрдэнийн бүрэн эрхийн хугацаа дуусахыг хүлээж тэсэхээргүй уур бухимдалтай байгааг нуух юун. Гэхдээ МАН-д өнөөдөртөө УИХ-ын чуулганы хуралдаанд орж ирээд түүний өөдөөс огцор гээд саналаа өгчих зоригтой хүн алга. Хэн тэгэж “алуулах”-ыг хүсэх юм. Хэрэв ийм ажиллагаа УИХ-аар өрнөөд тэр тэсээд үлдвэл эсрэг санал өгсөн нөхөд “алуулна” биз дээ. Нөхцөл байдал нэгэнт ийм байгааг тэд мэдэж байгаа. Монгол Улс, ард иргэдийн хувьд бол ярих юм алга. Үнэхээр том нүгэл үйлдсэн цор ганцхан Ерөнхий сайд. Тэгэхээр хэн “цовдлуулах”-ыг хүсэх юм. Унахгүйн тулд бүх аргаа хэрэглэнэ.

УНАХГҮЙ БАЙХ ШАЛТГААНЫГ ДУРДАХАД ИЙМ БАЙНА

Унахгүй тэсэж үлдэх нэг том шалтгаан нь АН, түүний дарга Л.Гантөмөр. Л.Гантөмөрийн хувьд Засгийн газрын хөнжилд байх нь үнэхээр таатай байгаа. Тиймээс тэр аль эрт “Засгийн газрыг аварч үлдэнэ шүү. Ерөнхий сайдыг огцруулах эсэх асуудлыг УИХ-аар оруулж магадгүй нөхцөл үүсчихлээ. Үүний чинь шан харамжид ийм тендер, тийм албан тушаал өгнө” гэх мэтээр 45 гишүүндээ дуулгачихсан байгаа. Л.Оюун-Эрдэнээс авсан даалгавар л даа. АН дотор ийм амлалтаас буцаж даргынхаа өөдөөс сөрөх нэг ч гишүүн байхгүй. Уг нь Л.Оюун-Эрдэнийг унагаах шаардлагатай нөхөд АН дотор байгаа ч тэд нарт ямар ч эрх мэдэл алга. Ерөнхийлөгч асан Х.Баттулга, Ц.Элбэгдорж, УИХ-ын гишүүн асан С.Баярцогт нар гээд олон хүн хэчнээн бодлоо ч гудамжинд байгаа учраас яах ч билээ. Ж.Баярмаа мэтээр ялих шалихгүй зүйл яриулахаас хэтрэхгүй байна. Нөгөө талаар ХҮН нам, Т.Доржханд гэж нэг тэнчээ чагтага байгааг яриад ч яахав. Ер нь бол Л.Оюун-Эрдэнэ унаж болох ч Л.Гантөмөр, Т.Доржханд хоёр унагаахгүй л дээ.

УНАХ ШАЛТГААНЫГ ДУРДВАЛ НАС ГҮЙЦЭХГҮЙ

Л.Оюун-Эрдэнийн унах шалтгааныг дурдаад барахгүй. Тэгэхээр шалтгаан бүхнийг дурдана гэвэл Л.Оюун-Эрдэнийн балгаар зохиол туурвина гэвэл энэ нас гүйцэхгүй учраас орхихоос өөр аргагүй. Сүүлийн таван жил түүний хийсэн ажил бол зөвхөн худлаа ярьсан. Бид “Шинэ сэргэлтийн бодлого”-оос эхлээд хэрэгжих бодит ажил нэг ч байхгүйг мөн ч олон удаа бичсэн дээ. Цаасан дээр ч үлдэхгүй ийм л ажлууд ярьдаг хүн. Өнөөдөр Монгол Улсын эдийн засгийн нөхцөл байдал, ард иргэдийн амьдрал Л.Оюун-Эрдэнийг Ерөнхий сайд болж байх үеийнхээс хоёр дахин уруудсан. Тийм ч учраас байнга худлаа статистик үзүүлдэг. Бүх ажил нь пиар технологийн хүчээр хоосон өрнөж ирсэн ийм л Ерөнхий сайд. Энэ байдлаар дараагийн сонгууль үзнэ гэвэл эх орон ч үгүй болж мэдэхээр харагдана. Түүнд огцрохгүй байх шалтгаан үгүй. Товчхондоо ийм.

Songolt.mn