Дорноговь аймгийн “Хурмаст тэнгэр” төвийн зохиолч, яруу найрагчдын “Дорнын алтан аялгуу” ном уншигч олны гар дээр очиж, нээлтээ Улаанбаатар хотноо Занабазарын нэрэмжит дүрслэх урлагийн музейд нээсэн бол өнгөрөгч лхагва гаригт Дорноговийн төв Сайншанд хотноо нээсэн юм. “Дорнын алтан аялгуу” номонд Говийн догшин ноён хутагт Д.Данзанравжаа, Цанид Ловон Шагдар, Хуульч Сандаг, Анги Шагдар нараас эхлээд Ардын уран зохиолч, Төрийн шагналт, Соёлын гавьяат зүтгэлтэн зохиолч Б.Догмид, Төрийн шагналт, Соёлын гавьяат зүтгэлтэн яруу найрагч Ш.Гүрбазар, нэрт сэтгүүлч зохиолч, Г.Жамъян, А.Шартолгой, Х.Цэрэндорж, Л.Одончимэд, Л.Цагаандалай, А.Эрдэнэ-Очир, Л.Эрдэнэбат, Г.Мөнхцэцэг нарын Соёлын гавьяат зүтгэлтнүүд болон үе үеийн төлөөлөл болсон 108 уран бүтээлчийн шилмэл бүтээл багтсан болно.

Сайншанд хотноо зохион байгуулсан номын нээлтийн үеэр номонд бүтээл нь багтсан нэр төртэй 40-өөд уран бүтээлчийн гарын үсэгтэй “Дорнын алтан аялгуу” номыг дуудлага худалдаанд оруулсан юм. Номын дуудах үнэ 108 мянган төгрөгөөс эхэлж, Дэчэнчойнхорлин хийдийн хамба лам Б.Сэнгээ “Дорнын говийн алтан аялгуу” номыг 700 мянган төгрөгөөр үнэлэн авлаа. Энэ үеэр уншигч олон "Дэчэнчойнхорлин хийдийн хамба лам Б.Сэнгээ нь аймаг, орон нутгийнхаа уран бүтээлчдийн зохиол бүтээлийг өндрөөр үнэлдэг шашны зүтгэлтэн хүн" гэдгийг магтан ярьсан юм. “Дорнын алтан аялгуу” ном нь энэ мэтээр хэвлэгдсэн цагаасаа хойш олны анхаарлыг татаж байгаа бөгөөд Дорноговь аймгийн Засаг даргын тамгын газар, аймгийн Иргэдийн төлөөлөгчдийн хурал, Алтанширээ, Дэлгэрэх, Сайхандулаан тэргүүтэй олон сумаас захиалга ирүүлжээ.

С.Ууганбаяр