Улаанбаатар хотын дөрвөн цэгт Малчдын зах байгуулж байсан нь саяхан хэдий ч эртний юм шиг нийслэлчүүдийн танил газруудын нэг болжээ. Тус зах нь малчдын малын махыг ченжийн гараар дамжуулахгүй байх, нийслэлчүүдэд хямд үнэтэй мах борлуулах, малчдын ашиг орлогыг нэмэгдүүлэх олон зорилго дор үүд хаалгаа нээсэн.

Гэтэл сүүлийн үед Малчдын захын талаар таагүй мэдээлэл хөврөх болжээ. Иргэдийн зүгээс Малчдын зах нээгдсэн цагаас хойш хямд үнэтэй, чанартай мах хэрэглэж байгаа хэмээнэ. Харин хэвлэл мэдээллийн зүгээс таагүй мэдээлэл сурвалжилга үзэгдэх болов. Тухайлбал, зарим махны ченжүүд Хүчит шонхор захаас махаа бөөндөж аваад, малчдын гар дээрээс мах худалдаалах цэг дээр үнэтэй зарж байна” гэх мэдээлэл хүртэл бий.

Тэгэхээр ченжүүдийн арга нарийсч Малчдын захыг өөрсдийн гарт хийж, арга технологи, дамжих нэгэн баазаа болгов уу гэх асуулт ч хариултаа нэхэж байна. Энэ тухай хариулт олох гэж хичээсний эцэст Хүчит шонхор захын орлого багасч, тэдний эсрэг турхирч эхэлсэн бололтой. Малчдын зах байгуулагдахаас өмнө Хүчит шонхор зах нийслэлд махны үнийг тогтоож, чамгүй хувийг ч базаж байсан. Тэгэхээр нийслэлд малчид гар дээрээсээ малын махаа борлуулах дөрвийн дөрвөн цэг байгуулчихаар ашиг орлого нь буурах нь ойлгомжтой. Яаж ч бодсон тэдний хувьд бизнесийн орчин таатай байхгүй.

Хүчти шонхор захаас Улаанбаатарын иргэд төдийгүй бүх хүнсний захууд махаа худалдан авдаг байв. Одоо энэ байдал үгүй болсон учраас бизнес хооронд янз бүрийн мэдээ мэдээлэл зориуд түгээх болсон байхыг үгүйсгэхгүй. Ямартай ч Хүчит шонхор захыг Эрүүл мэндийн сайд асан Т.Мөнхсайханы эцэг байгуулсан бөгөөд өдгөө Т.Мөнхсайхан ахтайгаа хамтран эзэмшдэг гэх мэдээлэл бий.

Songolt.mn