ХҮН намын дарга, Шадар сайд Т.Доржханд Эрчим хүчний реформын үндэсний хороог удирдаж, гишүүдээр нь ХҮН намын Б.Найдалаа, Ж.Золжаргал хоёр ажиллаж байсан. Тиймдээ ч Т.Доржханд төрийн өмчит эрчим хүчний компаниудын удирдлагад ХҮН намынхнаа менежерээр илгээж, нөлөөллөө тогтоосон. Ингэхдээ Шадар сайд Т.Доржхандын ахалсан “Эрчим хүчний реформын үндэсний хороо” гэж сүрхий нэртэй газрыг долоон хүний орон тоотойгоор байгуулж, ажил нь гацсан хэдэн эх үүсвэрээ цааш хөдөлгөж, шинээр эх үүсвэр нэмэхгүй бол мянган Т.Доржханд байгаад ч шинэчлэл байхгүй гэпдгээ харуулж байна. Гэтэл реформын хороо маань энэ зүгт ажлаа эхлүүлэхээсээ өмнө 2025 оны үйл ажиллагааныхаа төсвийг 13 тэрбум төгрөгөөр батлуулаад авсан байдаг. Долоон хүнтэй хороонд бол ахадсан л төсөв.

Тухайлбал, долоон хүний нэг жилийн цалингийн зардалд 600 сая, хангамж бараа материалын зардалд 377 сая, тээвэр шатахуунд 200 сая, байрны төлбөрт 80 сая, гадаад сургалт томилолт 800 сая, дотоод томилолт 500 сая гэх мэтээр явж өгнө. Эндээс харахад зөвхөн гадаад дотоод томилолтод 1.3 тэрбум төгрөг явчихаж байна. Ямартай ч Шадар сайд маань татвар төлөгч бидний 800 сая төгрөгөөр гадаадад зугаалах аж. Үүнээс гадна хурлын зардалд 200 сая, танилцуулга брошур хэвлэхэд 350 сая төгрөг, хуулийн гэрээний төлбөрт 500 сая төгрөг гэх зэргээр төсвийн задаргаа байна.

Зөвхөн танилцуулга брошур хэвлэхэд 350 сая төгрөг зарцуулахаар төлөвлөсөн нь Т.Доржханд сайдын пиарыг хийхэд зарцуулагдана. Түүнээс бус эрчим хүчний чиглэлд явж байгаа төслүүд бүгд болох болохгүйгээ яриад мэдээлэл өгөөд явж байна. Бүхний нүдэнд ил өрнөж байгаа гацаж зогссон салбар гэдгийг ч иргэд бултаараа мэднэ. Энд Т.Доржхандын хэрэг ч алга. Нөгөө талаар төсвөө ахиухан тавиулах гэж нэлээд зовсон нь харагдана. Ямар сайндаа машины зогсоолд таван сая төгрөг, өрөөний цэвэрлэгээнд 12 сая, бага үнэтэй түргэн элэгдэх зардалд 15 сая төгрөг гэх мэт зардал төлөвлөсөн байна. Долоохон хүнтэй хороонд 13 тэрбум төгрөг ахадсан асуудал шүү, Т.Доржханд сайд аа.

Тэгээд эрчим хүчний реформ нэрээр Т.Доржхнад тэргүүтэй хүн намынхан мөнгө “идэх” л арга хайж байгааг юу юунаас харж болно.

С.Баяр