"Ховдоос Харвард руу” хэмээн пиар хийж, 2024 оны сонгуулиар УИХ-д орж ирсэн УИХ-ын гишүүн О.Батнайрамдал Намрын чуулганы завсарлагаанаар Стэнфордын их сургуульд ардчилал, хууль эрх зүйн чиглэлээр зочин судлаачаар ажиллаж байгааг мэдээлэх болжээ.

Одоо тэр “Стэнфордоос сар руу” гэсэн пиар хийх байх. Үнэн хэрэгтээ манай УИХ-д намтар дүүрэн сургуулийн нэр зоосон гарууд олон л байсаар ирсэн. Одоо ч байна. Тэд гадны технологи сурна уу гэхээс Монгол Улсад хэрэгтэй инженер болж ирдэггүй. Л.Оюун-Эрдэнэ Ерөнхий сайдаар ажиллаж эхлэхдээ Япон улсад 1000 инженер сургана гээд явуулж эхэлсэн. Үнэн хэрэгтээ арлын оронд инженерээр бэлтгэгдсэн залуус тухайн орны технологийг тухайн орны нөхцөлд сурч, хийж сурна уу гэхээс Монгол Улсад ирээд хэрэггүй. Тухайн орны нийгмийн байдал, цаг уурын нөхцөл байдал, зохион байгуулалт гээд бүхий л зүйл тэс өөр учраас төдийлөн хэрэг болдоггүй. Гадаадад суралцаад ирсэн өндөр боловсролтой гэх нөхөд нүүдэлдчийн шинэ тутам хөгжиж буй нийгмийн хөрсөн дээр гадны өндөр технологи байршуулах гээд бүтэлгүйтэж байснаас онож байгаагүй. Тэр чигээрээ алдаа гэдгийг салбар салбарынхан хэлдэг.

Тухайлбал, АН-ын дарга Л.Гантөмөр БСШУ-ны сайдаар ажиллаж байхдаа Кембрижийн хөтөлбөр гэх зүйл оруулж ирж Монголын боловсролын салбарыг хорлосон. “Гадаадад барлига, зам гүүрийн инженерээр төгсөж ирсэн нөхөд эх орондоо ирж ажиллахаар амьдрал мэдэхгүй, улсынхаа онцлогт тохирсон зүйл хийж мэддэггүй учраас алдаа гаргадаг” хэмээн салбарынхан ярьж байсан.

Тэгэхээр өнөөдөр манай улсад болсон болоогүй боловсрол дутаагүй. Гагцхүү сэтгэл дутаж байгааг л хаа хаанаа анхаарах хэрэгтэй. Шуудхан хэлэхэд “Ховдоос Харвард руу” хэмээн иргэдийн тархи угааж байхаар сурсан мэдснээ улс орон, ард түмэндээ зориулчих сэтгэл л дутаж байгаа юм.