Хотын дарга Х.Нямбаатарын зөвлөх асан Ч.Батзориг Түгжрэл бууруулах төслийн нэгжийн захирлын эрх мэдлээ ашиглан, 8.3 тэрбум төгрөгийн тендерийг бэр дүүгийнхээ компаниар завшсан маш ноцтой баримтыг цахим орчинд дэлгэжээ.

Ч.Батзориг айлын том, дороо дөрвөн дүүтэй. Төрсөн дүү Ч.Мөнхбат нь ЦЕГ-т ажилладаг. Харин Ч.Мөнхбатын эхнэр Гонжидийн Жаргал гэх эмэгтэй бий. Г.Жаргал нь “Эм Ти Юу” ХХК-ийг эзэмшдэг. Тэгвэл Х.Нямбаатарын зөвлөх асан Ч.Батзориг Түгжрэлийг бууруулах төслийн нэгжийн захирал байхдаа бэр дүү Г.Жаргалынхаа “Эм Ти Юу” ХХК-иар 8.3 тэрбум төгрөгийн тендер завшсан байгаа юм. Хамгийн ноцтой нь, Ч.Батзоригийн хувьдаа авсан уг тендер нь Улаанбаатар хотын түгжрэлийг бууруулах зорилгоор хотын төвд автомашины олон давхар зогсоол барих тендер байжээ.

Тэрбээр 2022 оны есдүгээр сарын 8-нд “Их багтаамжийн зогсоол шинээр барих” нэртэй 8.3 тэрбум төгрөгийн төсөвтэй тендер зарлаж, бэр дүү Г.Жаргалынх нь “Эм Ти Юу” ХХК оролцсон ч хасагдсан байгаа юм. Тэгэхээр нь тус тендерийг “амжилтгүй болсон” гэж цуцалсан. Улмаар Ч.Батзориг хоёр сарын дараа буюу 2022 оны арваннэгдүгээр сарын 7-нд “Их багтаамжийн зогсоол шинээр барих” нэртэй 8.3 тэрбум төгрөгийн төсөвтэй тендерээ дахин зарласан. Бас л “Эм Ти Юу” ХХК нь хасагдсан. Тус тендерийг мөн л “амжилтгүй болсон” гэж бүртгэж цуцалсан. Гэтэл дахиад хоёр сарын дараа буюу 2023 оны гуравдугаар сард “Их багтаамжийн зогсоол шинээр барих” нэртэй өнөөх 8.3 тэрбум төгрөгийн тендерээ нийслэлийн Худалдан авах ажиллагааны газраар дамжуулан дахин зарласан. Харин тус тендерт нь “Эм Ти Юу” ХХК ганцаараа оролцож, ногоон гэрлээр шалгарчээ. Өөрөөр хэлбэл, Ч.Батзориг дээрх 8.3 тэрбум төгрөгийг зөвхөн бэр дүүгийнхээ “Эм Ти Юу” ХХК-д өгөхийн тулд тендерийг гурван удаа зохион байгуулсан нь харагдаж байгаа юм.

Улаанбаатар хотын түгжрэлийг бууруулахын тулд зөвхөн 2022, 2023 онд л гэхэд 840 тэрбум гаруй төгрөг төсөвлөж, зарцуулсан. Гэхдээ энэ мөнгө хаашаа орсон нь тодорхойгүй, бид авто зам дээрээ тэг зогссоор буй нь бодит үнэн. Тэгвэл лавтай л дээрх мөнгөний 8.3 тэрбум нь Хотын дарга Х.Нямбаатарын зөвлөх Ч.Батзоригт очжээ гэсэн үг. Гэхдээ энэ бол түүний түгжрэлийн төсвөөс идсэн мөнгөний ердөө ганцхан жишээ гэдгийг дуулгажээ.

Songolt.mn