Ерөнхий сайд Г.Занданшатар энэ долоо хоногт Засгийн газрын бүрэлдэхүүнээ УИХ-аар батлуулж, сайд нараа танилцуулна гэсэн хүлээлт хаа хаанаа байна. Гэтэл сайдаараа улирч үлдэх гэсэн акулуудын зодоон, шинээр томилогдох гэсэн хоёрдугаар ээлж хоёрын дунд зодоон өрнөөд амар биш байгаа бололтой.

Харин Ерөнхий сайд Г.Занданшатар өнгөрөгч Баасан гаригийн УИХ-ын чуулганы нэгдсэн хуралдаанд "Шинээр байгуулагдах Засгийн газар МАН, АН, ХҮН намын 2024 оны УИХ-ын сонгуульд дэвшүүлсэн мөрийн хөтөлбөрийн зорилтуудыг тусгасан, хамтарсан Засгийн газрын үйл ажиллагааны хөтөлбөрийг үргэлжлүүлэн хэрэгжүүлж, амжилт ололтыг улам бататгаж ажиллах болно" хэмээсэн болохоор хамтарсан Засгийн газар байгуулагдах нь тодорхой болж байна. Гэхдээ МАН-аас Засгийн газраа хамтран байгуулах эсэх дээр эцсийн шийдэл хараахан хүрээгүй. Ямартай ч МАН-ын бүлгийн хуралдаанаар уг асуудлыг шийдэж таарна. АН бол засагт орохгүй гэсэн байр суурьтай байгаа. Одоохондоо шүү. Орохгүй гэж байгаад ороод ирэхийг байг гэхгүй. Г.Занданшатар сайдын хувьд МАН дангаараа засаглах нь эрсдэлтэй гэж үзээд ИЗНН, ХҮН, Үндэсний эвслийг оруулах сонирхолтой байгаа ч МАН-ынхан дангаараа засаглахыг илүүд үзэж байгааг эх сурвалж хэлж байсан.

Тиймдээ ч шинээр сонгогдсон гишүүд хуучин сайд нарыг шинэ Засгийн газарт улираан томилохгүй байх шаардлагыг Ерөнхий сайд Г.Занданшатарт хүргүүлсэн. Тэгвэл дээрх гурван намтай хамтрахдаа тулвал ХҮН намаас Т.Доржханд лав Шадар сайдаараа үлдэж, хэн нэгнээ сайдаар чирж таарна. Харин Үндэсний эвслээс Тэргүүн Шадар сайдаар Н.Номтойбаяр орж ирнэ. ИЗНН-аас Б.Батбаатар Байгаль орчны сайдаар орж ирэх төлөв бий.

Ингэхээр гаднаас дөрвөн сайд орж ирснээр бусад нь МАН-аас томилогдоно. Яаж ч бодсон 42 суудалтай АН-тай нэгдэхгүйгээс хойш, найман суудалтай ХҮН нам, тус бүр дөрвөн суудалтай ИЗНН, Үндэсний эвслийг засгийн гадна орхиж болохгүй. Тэгэхээр МАН-ын Засгийн газар эсрэг 42 биш 68 гишүүн босно. Үнэхээр хэврэг, богинохон настай Засгийн газар бий болно гэсэн үг. Тэгэхээр гурван нам яах аргагүй шинэ Засгийн газарт орж ирэх нь тодорхой.

С.Данзан