УИХ-ын гишүүн С.Ганбаатар “Хадны завсар хавчуулагдсан халиуны зулзага хөөрхий” гэдэг болоод байсан ч АН-д орсноор гарч ирсэн. 2020 оны сонгуульд тэрбээр Орхон аймагт МАХН-аас нэрээ дэвшүүлэн сонгогдсон. Ингэхдээ С.Ганбаатар үхсэн ч АН, МАН-д орохгүй гэж мэдэгдэж байсан. Өөрөөр хэлбэл эрдэнэтүүчдэд ийн амлалт тангараг өгөөд парламентад орж ирсэн хүн. Гэтэл өдгөө тэр АН-д данслагдаж явна. Нөгөө талаар тэр АН-д нэр нүүрээ барсан, квот авах боломжгүй гэдгийг эх сурвалж хэлж байна. Тэгэхээр түүний мухардалд орсон шалтгааныг тодруулъя. Хэдэн жилийн өмнө түүнийг том нам, бүлэглэлүүдэд орж байгаа гэсэн мэдээлэл тарахад С.Ганбаатар “Ардчилсан нам, МАН-аас тодорхой яриа хэлцлүүд хийсэн байж болно. Хамгийн гол нь МАНАН-д орохгүй гэдгээ давтан хэлье. Үүнд Ардчилсан нам, МАН аль аль нь орж байгаа. Мөрөөдлөөсөө, үзэл бодлоосоо ухрахгүй” хэмээн хэлж байсан ч ийнхүү эрх ашгийнхаа төлөө явж байна.

Гэтэл С.Ганбаатар МАХН, МАН-тай нэгдэж, 2021 оны Ерөнхийлөгчийн сонгуульд оролцохыг эрс эсэргүүцэж байгаагаа илэрхийлсэн. Гэвч МАН, МАХН хоёр нэгэнт нэгдсэн учраас тэр МАХН-ын гишүүнчлэлээсээ албан ёсоор татгалзаж буйгаа мэдэгдсэн юм. Удсан ч үгүй, залгуулаад шууд Ардчилсан намд гишүүнээр элссэн нь олны дургүйцлийг төрүүлсэн юм. Ерөөсөө тэр сонгууль бүрийн өмнө аль нэг намд элсэж, тухайн намтайгаа тохиролцож чадахгүй бол бие даачихдаг хүн. Ойроос намтар сөхөхөд ХҮН-аас бие даагч, бие даагчаас МАХН-д элссэн гээд улс төрийн нам солигч, самрагч гэж цоллочиход буруудахгүй болов уу.

Шүргэсэн, нөмөр бараадсан нам бүрээ устгаж, үгүй хийж байдаг нэг ийм популист нөхөр гудамжнаас гэнэт тодорсон ч урт удаан нас байсангүй. Тэр өнгөрөгч сонгуулиар одоо үгүй болсон МАХН-ын нэр дээрээс өрсөлдөж ялалт байгуулсан учраас зарчмын хувьд Ардчилсан намд бус МАН-д байх ёстой гэж үздэг. Тэгээд ч эрдэнэтчүүд С.Ганбаатарт саналаа өгсөн үү, МАХН, Н.Энхбаярт өгсөн үү гэдэгт ч асуудал бий учраас тэр нуман тулгуурт ороод буй. С.Ганбаатар Н.Энхбаярын дэргэд бол хэн ч биш. Нэг муу сонирхогч. Тэр өөрийнхөөрөө шийдвэр гаргах туйлын сонирхолтой популист нөхөр төдийгүй экс намынхаа даргын характертай хүн.

Одоохондоо “Эх орон, ард түмэн” гэсэн популизмаа хийж, үнэн төрхөө ард түмэнд харуулж амжаагүй байгаа хэрэг. Ийм хоёр нөхрийн улс төрийн зам хэзээ ч нийлэхгүй гэдгийг бөөрөө нийлүүлж байхад нь бичиж байлаа. Харин санасныг бодоход чамгүй урт хугацаанд МАХН хэмээх дөрвөн үсэгний цаана улстөржиж, наана нь “Эх орон” гэж худлаа залсан хүн өнөөдөр нэгэнт мухарджээ. Гэхдээ түүнд Н.Энхбаяраас ч том амбиц бий. Энэ нь өнгөрөгч 2017 оны Ерөнхийлөгчийн сонгуулийн дараа “Би хэзээ нэгэн цагт Ерөнхийлөгч болно” хэмээн мэдэгдэж байснаас харагдана.

Тэгвэл саяхан мөнөөх "өвчин" нь хаврын синдромтой хамсан дахин сэдэрч "Монголд надаас өөр ерөнхийлөгч болохоор бэлтгэгдсэн хүн байхгүй. Би Ерөнхийлөгч болж Монгол Улсаа авармаар байна" хэмээн цээжээ дэлдээд буй.

Түүний хувьд 2017 оны Ерөнхийлөгчийн сонгуульд бараг л ялсантай тэнцэхүйц санал авсан. Эргэн сануулахад 2017 оны Ерөнхийлөгчийн сонгуулийн нэрсийн жагсаалтад 1.978.298 сонгогч санал өгөхөөр бичигдсэн байв. Харин нийт 1.341.707 гаруй сонгогч саналаа өгсөн. Өөрөөр хэлбэл Ерөнхийлөгчийн сонгуульд 50+1 хувийн санал авсан нэр дэвшигч Монгол Улсын тав дахь Ерөнхийлөгчөөр сонгогдох байсан. Хамгийн багадаа 671 мянга гаруй сонгогчийн санал авсан нэр дэвшигч Ерөнхийлөгч болох учиртай. Гэтэл Ерөнхийлөгчийн сонгуулийн санал хурааж дуусахад 1.2 сая орчим сонгогчийн санал байсан бөгөөд 50+1 хувийн санал авсан нэр дэвшигч тодроогүй. Тухайн өдөр хамгийн олон санал буюу 508.823 сонгогчийн саналыг аваад байгаа АН-аас нэр дэвшигч Х.Баттулгын хувьд нийт сонгогчдын дөнгөж 40 орчим хувийн саналыг авсан юм. Ингээд дахин санал хураалтад орж ялагдаж байсан түүх бол бий. Ямартай ч тэр улс төрийн ууган хүчний лидер улстөрч гэх М.Энхболдыг ялж чадсан. Ингэхдээ нийт 10 аймаг, нэг дүүрэгт ялалт байгуулсан. Хэрвээ тэр дахин нэг, хоёр дүүрэгт ялалт байгуулсан бол Ерөнхийлөгч болох байв. Аргагүй хоёр их мөнгө, нэр төрийн өөдөөс өрсөлдсөн нь үнэн. Гэхдээ зарим эх сурвалж нутгийнхаа ах Х.Баттулгыг дэмжиж, М.Энхболдын саналыг хуваахаар сонгуульд оролцсон ч гэж ярьдаг.

С.Баяр