УИХ-ын гишүүн Э.Батшугарын санаачилж, өргөн барьсан Зээлийн мэдээллийн тухай хуулийг УИХ-аар эцэслэн баталсан нь олны анхаарлыг татаж байна. Олны анхаарлыг татаж байгаа төдийгүй олзуурхаж байгаа зүйл гэвэл хуульд “Зээлдэгчийн “хар жагсаалт гэх санхүүгийн ялыг арилгана”, “Зээлийн хүү, зээлдэгчид тавигдах барьцаа хөрөнгийн шаардлага буурна”, “зээлийн хүү буурна” гэх таатай зүйл заалтууд бий.

Арга ч үгүй, өнөөдрийн нийгэмд хар жагсаалтад ороогүй иргэд тун цөөн бий. Нөгөө талаар хүссэн зээлээ авах гэхээр дааж давашгүй барьцаа хөрөнгийн шаардлага тавьдаг учраас иргэд аж ахуйн нэгжүүд хүссэн зээлээ авч чаддаггүй. Тэр тусмаа иргэд. Тиймээс иргэдийн хувьд ихээхэн баяр хөөртэй байна. Хууль батлагдсанаар дараагийн ажил эхэлнэ. Энэ нь Монголбанк зээлдэгчийн онооны системийг болон, холбогдох журмыг боловсруулж хэрэгжүүлэх юм.

Мөнхүү хууль хэрэгжиж эхэлснээр санхүүгийн үйлчилгээний хамгийн таатай нөхцөлийг зөвхөн том аж ахуйн нэгж, барьцаа хөрөнгөтэй зээлдэгч хүртдэг тогтолцоог өөрчилж зээлдэгчийн онооны мэдээлэлд тулгуурлаж зөвхөн барьцаа хөрөнгө шаардахгүйгээр уян хатан нөхцөлтэй зээлийг санхүүгийн сахилга баттай иргэдэд олгох нөхцөлийг бий болгоно;

Онооны систем нэвтэрснээр зээлийн эрсдэлийг үнэлэх боломж нэмэгдэж, зээлийн хүртээмж илүү оновчтой болох нөхцөл бүрдэнэ. Түүнчлэн банк, санхүүгийн салбарын үйлчилгээний хүртээмж сайжирч, салбарын өрсөлдөөнийг нэмэгдүүлж иргэд банкны шаардлагаар бус өөрийн хүссэн банкийг сонгон үйлчлүүлдэг болно, банк, санхүүгийн салбарын эрсдэл даах чадварыг нэмэгдүүлж эдийн засаг, санхүүгийн тогтвортой байдалд эерэг нөлөөлөл авчирна гэх зэрэг эерэг өөрчлөлтүүд бий болжээ.

Хамгийн гол асуудал нь банкуудын монополь байдлыг халж, тэдэнд эрүүл өрсөлдөөнийг бий болгох нь зээлдэгчдэд таатай нөхцлийг авчирна.

Songolt.mn