БНСУ-ын Сөүлийн баталгааны даатгалын газрын гүйцэтгэх захирал, Азийн Баталгаа, зээлийн даатгалын холбооны дарга И Мён Сүн, тус газрын Гадаад бизнес хариуцсан газрын дарга И Тэ Хүн болон албаны холбогдох бусад хүмүүс Санхүүгийн зохицуулах хорооны дэд дарга Н.Хүдэрчулуунтай уулзалт хийснийхээ дараа “Үндэсний давхар даатгал” ХК-ийн гүйцэтгэх захирал Б.Жавхлант болон Андрайтинг, бизнес хөгжлийн газрынхантай уулзав.

“Үндэсний давхар даатгал” ХК нь анх 2022 онд Сөүлийн баталгааны даатгалын газартай хамтын ажиллагааны санамж бичигт гарын үсэг зурж, 2023 онд даатгалын тухай хууль эрх зүйн орчинд өөрчлөлт оруулах, даатгагчийн баталгааны бүтээгдэхүүнийг нэвтрүүлэхэд мэргэжил арга зүйн туслалцаа үзүүлэн мэргэжилтнүүдийг чадавхжуулах сургалтад хамруулж байсан билээ.

Уулзалтын үеэр Сөүлийн баталгааны даатгалын газар нь Санхүүгийн зохицуулах хороо, “Үндэсний давхар даатгал” ХК-тай хамтраад БНСУ-д хэрэгждэг санхүүгийн олон даатгалын бүтээгдэхүүнийг манай улсад хөгжүүлэхэд хөрөнгө оруулалт, холбогдох бусад туслалцааг үзүүлэх талаар хэлэлцэн тохиролцлоо. Сөүлийн баталгааны даатгалын газрын хувьд даатгагчийн баталгааны бүтээгдэхүүн нь гол бүтээгдэхүүн бөгөөд давхар даатгалын орлого нь нийт орлогын 10 хувийг эзэлдэг юм байна. Монголын эдийн засаг тэр дундаа даатгалын салбар хурдацтай хөгжиж байгаа энэ цаг үед үүнд дасан зохицон мэргэжилтнүүдээ сургах нь зайлшгүй байгаа бөгөөд 2 компанийн хамтын ажиллагаа 1-2 жил биш 10-20 жилийн урт хугацаанд үргэлжлэх нь зүйтэй хэмээн онцоллоо.

Одоогийн байдлаар санхүүгийн шинэ төрлийн бүтээгдэхүүнийг хөгжүүлэхэд хамтран ажиллах, баталгаа гаргах үйл ажиллагааг мэргэжлийн өндөр түвшинд нарийн төлөвлөлт, судалгаа шинжилгээнд суурилсан, мэргэшсэн боловсон хүчин, бүтэц, бүрэлдэхүүн бүхий эрсдэлийн удирдлагын тогтолцоог бүрдүүлэх боловсон хүчнийг ахисан шатанд чадавхжуулахад хамтран ажиллахаар боллоо.