ХУУЛИЙН НЭМЭЛТ ӨӨРЧЛӨЛТИЙГ ӨРГӨН БАРИЛАА
Өнгөрөгч нэгдүгээр сард УИХ-ын дарга Д.Амарбаясгаланд УИХ-ын гишүүн, Сангийн сайд Б.Жавхлан Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төслийг өргөн барилаа. Малчдын амьдралын баталгаа болсон мал сүргийг зуд болон бусад гэнэтийн эрсдэлээс хамгаалах зорилгоор 2014 онд уг хуулийг УИХ-аас баталсан. Малын индексжүүлсэн даатгалын тухай хуулийн дагуу даатгалд жилд дунджаар нийт малчин өрхийн 11-18 хувь, нийт малын 7-10 хувь нь хамрагдаж байна. Хуулийн нэмэлт, өөрчлөлтөөр уур амьсгалын өөрчлөлт, зудын гамшигт үзэгдэл нэмэгдэхийн хэрээр нөхөн төлбөр олгох босго үзүүлэлтийг хуулиар хатуу тогтоож өгсөн байгааг шинэчлэх, үргэлжлэн бий болох зудын хүнд нөхцөлийг даван туулах хүрээнд даатгуулагч малчин болон даатгалын компани хооронд байгуулсан тухайн жилийн гэрээний дүнг үндэслэн нөхөн төлбөрийн тодорхой хэмжээг нэг удаа урьдчилсан байдлаар олгох зэрэг зүйл заалтыг боловсруулжээ. Тус хуульд нэмэлт, өөрчлөлт оруулснаар малчдын даатгалын хамрагдалтыг нэмэгдүүлж тогтвортой байдал, зудын эрсдэлийн нөлөөллийг бууруулахад чухал ач холбогдолтой гэж хууль санаачлагчид үзжээ. Тухайлбал, нөхөн төлбөрийг урьдчилан олгохтой холбоотой зохицуулалтыг тусгаснаар үргэлжлэн тохиолдож болзошгүй зудын эрсдэлээс урьдчилан сэргийлэх боломж бүрдэнэ гэж үзсэн учраас ийнхүү шуурхайлсан хэрэг.
АЖЛЫН ХЭСГИЙН ХУРАЛДААНД ЭРДЭМТЭН СУДЛААЧИД ОРОЛЦОО
Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг Байнгын хорооны болон чуулганы нэгдсэн хуралдаанаар хэлэлцүүлэх бэлтгэл хангах үүрэг бүхий ажлын хэсгийнхэн хурлаа хийлээ. Тус ажлыг УИХ-ын гишүүн Ц.Идэрбат ахалж байгаа бөгөөд ажлын хэсгийн гишүүдээр УИХ-ын гишүүн, Аж үйлдвэржилтийн байнгын бодлогын байнгын хорооны дарга С.Ганбаатар, УИХ-ын гишүүн, Эдийн Засгийн байнгын хорооны дарга Р.Сэддорж, УИХ-ын гишүүн У.Отгонбаяр, УИХ-ын гишүүн Р.Батжаргал ажиллаж буй. Тэгвэл ажлын хэсгийн зүгээс өргөн барьсан төслийн хүрээнд нэлээдгүй өөрчлөлт хийхийг гол зорилгоо болгож төлөвлөгөө, дэд ажлын хэсгийг байгуулан УИХ-ын чуулганы завсарлагаанаар малчид, даатгагч, эрдэмтэн судлаачдын гэх мэт талуудын оролцоотой уулзалтуудыг зохион байгуулахаар төлөвлөлөө. Энэхүү асуумж нь 2025 оны Улсын Их Хурлын хаврын чуулганаар хэлэлцэх Малын Индексжүүлсэн Даатгал /цаашид “МИД” гэх/-ын тухай хуулийн шинэчилсэн найруулгын төслийг боловсруулахад нэмэлт өөрчлөлтийн цар хүрээг тодорхойлох, зах зээлийн эрэлт, хэрэгцээг судлах, асуудлыг шийдвэрлэх үр дүнтэй хувилбарыг тодорхойлох зорилгын хүрээнд хийгдэж буй судалгаа болно.
