Монголын тэрбумтнууд "Эрэл"-ийн Б.Эрдэнэбат, УИХ-ын гишүүн асан "Жем интернэшнл" группийн эзэн, улсын гарьд Ц.Цэрэнпунцаг, ЦЕГ-ын дарга асан Ж.Болдын хүү, Таванбогд группийн захирал Ц.Баатарсайханы хүү нар зодоон хийж, нэгэн залууг хэвтэрт ортол зодсон мэдээлэл бий. Тэд зодоон хийх үедээ мансууруулах бодис хэрэглэсэн байсан гэх яриа олон нийтийн сүлжээгээр явж байгаа ч одоогоор дэлгэрэнгүй мэдээлэл өгөөгүй байна.

Түүнчлэн Таван богд группийн захирал Ц.Баатарсайханы хүү Б.Амарсайханыг энэ сарын 20-нд хил давсан энэ сарын 27-нд ирнэ гэх мэдээлэл ч цацагдаад байгаа юм. Тиймээс ЦЕГ-аас энэ талаар тодруулахад, "Хэргийг харьяа дүүргийн хэлтэст шалгаж байгаа мөрдөн шалгах ажиллагаа үргэлжилж байгаа учир тодорхой мэдээлэл өгөх боломжгүй. Мөн мансууруулах сэтгэцэд нөлөөт бодис хэрэглэсэн эсэхэд сорил тавьж үзсэн одоогийн байдлаар шалгалтын ажиллагаа үргэлжилж байна" гэсэн юм. Мансууруулах бодис хэрэглэсэн нь хэдий хугацаанд хариу нь гардгийг тодруулахад," Мансууруулах бодис хэрэглэсэн эсэхийг хоёр үе шаттай тогтоож болдог. Сорилын хариуг холбогдогч этгээдэд танилцуулж улмаар хариуг хүлээн зөвшөөрөхгүй бол дахин сорил авдаг" гэхээс өөр мэдээлэл өгсөнгүй. Мөн хэрэгт нэр холбогдсон Таван богд группийн захирал Ц.Баатарсайханы хүү Б.Амарсайханг хил давсан эсэхийг тодруулахад, "мөрдөн шалгах ажиллагаа үргэлжилж байгаа учир үүнийг хэлэх боломжгүй" гэлээ. Харин ЦЕГ-аас мэдээлэл хийх үеэрээ гэмтсэн иргэний хувьд биеийн байдал сайнгүй, эмнэлэгт эмчилгээ хийлгэж байгаа гэдгийг хэлсэн.

Тэгвэл Гэмтэл согог судлалын үндэсний төвөөс хохирогчийн биеийн байдлыг асуухад, "Хувь хүний эрүүл мэндтэй холбоотой асуудал учир мэдээлэл өгөх боломжгүй. Ар гэрээс нь асуугаарай" гэлээ.

Ямартай ч тэрбумтнуудын хүүхдүүд нийлэн, нэгэн гэм зэмгүй залууг эрэмдэг болгоод байгааг холбогдох газар сайтар шалгаж, тохирох ялыг нь өгөх хэрэгтэй хэмээн цахим сүлжээнд иргэд давалгаалж байна.

Songolt.mn