Ерөнхийлөгч асан Х.Баттулгын хууль бус үйлдэлд нь хойшлуулалгүй нэгжлэг хийж, баривчлахаар болоход Монголын жүдочид Баянгол зочид буудлыг хамгаалалтад авч байсныг санаж байгаа байх. Энэ мэтээр бизнесмэнүүд бөхчүүдээр хамгаалуулж, рекэт хийлгэдэг тухай яриа ч байдаг. Тэгвэл Монголын чөлөөт бөхийн холбооны лого бүхий машин хөлөглөсөн Чөлөөт бөхийн шүүгч Жаргалсайхан, XX хорооны Засаг дарга С.Мөнхсутай, Баянзүрх дүүргийн Байгаль орчны газрын байцаагч н.Цогтбаатар, дүүргийн ИТХ-ын төлөөлөгч Б.Нямдорж нарын хамт Гачууртад өөрийнхөө эзэмшил газар хашаа хатгах гэж байгаа иргэдийг очиж хөөж туун дарамталсан байна.

Үүнээс харахад Монголын чөлөөт бөхийн холбоо нь хурган дарга нарт үйлчилж иргэдээ дарамталдаг болоо юу гэмээр. Уг нь бол тухайн иргэн нийслэлийн Газрын албанаас зарласан газрын дуудлага худалдаанд оролцож, Гачууртад газар худалдан авч, тус газар дээрээ хашаа барих хэрэг. Гэтэл хурган дарга нар Чөлөөт бөхийн холбооны төлөөлөл болсон шүүгч Жаргалсайханы хамт очиж хөөж тууж, хашааг нь бариулаагүй юм байна. Нэгэнт өөрийн болгосон газар дээр хашаа барих гэж байхад хөөж тууж байгаагийн цаана авлига, газрын наймааны асуудал байгаа нь ойлгомжтой.

Монголын чөлөөт бөхийн холбоо гэх их айл бол Монгол Улсын нэрийг тив дэлхийн тавцанд гаргадаг олон шилдэг тамирчид, спортод элэгтэй олон бизнесмнэүүдийн сэтгэл зүтгэл дор үйл ажиллагаа явуулдаг байгууллага юм. Харин түүний нэг эд эс нь Чөлөөт бөхийн холбооны лого бүхий машин хөлөглөн, хурган дарга нарт үйлчилж, иргэдээ дарамталж яваа нь харамсалтай. Энэ мэт зүйлд Монголын чөлөөт бөхийн холбооны тэргүүн Я.Содбаатар болон холбогдох хүмүүс анхаарна биз ээ.

С.Данзан