Л.Оюун-Эрдэнийн Засгийн газарт ажиллаж байсан сайдууд бүгд л улирч үлдэхээр улайрч байгаа бололтой. Одоогийн байдлаар МАН-аас Шадар сайдаар С.Амарсайхан, Зам тээврийн сайдаар Б.Дэлгэрсайхан, Аялал жуулчлал, соёл, спорт залуучуудын сайдаар Ч.Номин, Гадаад харилцааны сайдаар Б.Батцэцэг, Сангийн сайдаар Б.Жавхлан, Эрчим хүчний сайдаар Б.Чойжилсүрэн, Батлан хамгаалахын сайдаар С.Бямбацогт, Гэр бүл, нийгмийн хамгааллын сайдаар Л.Энх-Амгалан, Засгийн газрын Хэрэг эрхлэх газрын даргаар Н.Учрал нар ажиллаж байна. Харин анх удаа орж ирсэн хүн бол Хүнс, хөдөө аж ахуй хөнгөн үйлдвэрийн сайд Ж.Энхбаяр.

Эдгээр сайдууд өмнөх Засгийн газраас улирч үлдсэн сайдууд, ахиад ч улирах мөрөөдөлтэй энд тэнд хор хутгаж явна. Гэтэл шинээр сонгогдсон гишүүд хуучин сайд нарыг шинэ Засгийн газарт улираан томилохгүй байх шаардлагыг Ерөнхий сайд Г.Занданшатарт хүргүүлээд байгаа.

Энэ бол зөв зүйтэй шаардлага гэж үзэж байгаа. Нөгөө талаар улирааж үлдээхээс өөр аргагүй ганц нэг сайд байхыг үгүйсгэхгүй. Түүнээс бус шинэ Засгийн газарт ойртуулж боломгүй сайдууд ч бий.

Тухайлбал, салбараа ч мэдэхгүй, хувийнхаа компаниар дамжуулан тендер хамаж, зээл “гулгуулж” байдаг Батлан хамгаалахын сайд С.Бямбацогтыг юуны өмнө нэрлэж таарна. Түүнд МАН-аас бүх боломжийг өгсөн, тэр ч сайн ашигласан. Өнөөдрийг болтол мухар төмөр замтай л “ноцолдож” байгаа, өөрөө төмөр замтай гээд ашиг сонирхлын зөрчилтэй Зам, тээвэр хөгжлийн сайд Б.Дэлгэрсайхан удаалж таарна. Мөн соёл урлагийн салбарыг самарчихсан Аялал жуулчлал, соёл, спорт залуучуудын сайд Ч.Номингийн хугацаа аль эрт дууссан. Шадар сайд С.Амарсайханы хувьд ч одоо болсон. Түүнд энэ төрд гай удсан уу гэхээс гавьяа байгуулсан өдөр үгүй.

Хамгийн ноцтой асуудалтай хүн бол Сангийн сайд Б.Жавхлан. Түүний хувьд Монгол Улсын мөнгөний авдарны түлхүүрийг атгаж байсан, энэ хэрээр санхүү салбарыг самарсан гэдгийг мэргэжилтнүүд хэлдэг. Ёстой нэг байгуулсан ч гавьяагүй, цахим орчинд ажил хийж суудаг сайд бол Гэр бүл, нийгмийн хамгааллын сайд Л.Энх-Амгалан. Түүний хувьд хэлэх үг олдохгүй. Эдгээр сайдууд дундаас юуны өмнө хөөж явуулах ёстой хүн бол Эрчим хүчний сайд Б.Чойжилсүрэн. “Дулаан болохоор утаа арилна”, “Өвөл дулаарвал асуудалгүй өвөлжинө” гэх мэт мэдээлэл хийгээд зогсож байдаг сайдаар яахав дээ.

Харин үлдээх магадлалтай сайдууд гэвэл Гадаад харилцааны сайд Б.Батцэцэг, Засгийн газрын Хэрэг эрхлэх газрын дарга Н.Учрал нар байна. Б.Батцэцэг сайдын хувьд Монгол Улсын гадаад бодлогыг чамгүй өндөр түвшинд өргөж, дипломат харилцааг хөгжүүлэх, нэр хүндийг нь сэргээх тал дээр анхаарч ажилласан. Мөн Хүнс, хөдөө аж ахуй хөнгөн үйлдвэрийн сайд Ж.Энхбаярын хувьд салбараа эрх зүйн орчноос цэгцлэх гэсэн олон оролдлого хийсэн. Энэ ажлуудыг өөрөөр нь гардан үргэлжлүүлж болох юм. Н.Учралын хувьд нэгдүгээрт залуу, хоёрдугаарт ажлын дөр суучихсан, гуравдугаарт хийе бүтээе гэсэн зүтгэлтэй гэдэг утгаараа Г.Занданшатарын танхимд улиран орж ирэх магадлалтай юм.

Songolt.mn